Nos ta bek den e periodo prome cu slowdown y nos tin cu puntra nos mes ta kico e ta. Lo bay mira hopi mas movecion y Citgo ta cumpliendo cu e contracto. Segun prome minister Evelyn Wever-Croes, ta cosnan cu tin cu mira. E ta kere cu nan ta siguiendo e desaroyo tambe na Aruba. E desaroyo particular tabata cu ciudadanonan di Aruba a bay manifesta dilanti portanan di e refineria y esey a pone cu nan a remarca cu tin cu corda cu nan tey ainda y ta purbando di cumpli y cu tin contract cu nan.
Segun e prome minister, den e liña ey tin cu mira e bishita aki di Citgo. Un solucion mes no tin riba mesa. Si puntra prome minister, e ta un tiki skeptico. E kier mira. A tende mucho promesa bunita caba. A tende mucho tempo plannan bunita. Awor kier mira cosnan concreto. Ta mara na e contract. No tin un green light di abogado cu por sali for di e contract awor aki ainda. Ainda nan ta en espera di cierto informacionnan, haciendo investigacionnan con avansa e trabaonan tabata of no tabata. Mientras cu Gobierno ta mara na e contracto, esaki toch ta un bon noticia, pasobra con cu bay bin, e ta duna indicacion cu esnan cu nan a kere cu nan lo mester a bay kita for di trabao, no a wordo kita for di trabao. Esey semper ta un bon noticia pa un gobierno.
Sancion no a cambia
Sancionnan no a cambia. E lo wordo kita. Lo bolbe papia cu autoridad Mericano. Prome Minister tin un reunion pa atende na Washington e luna aki pa caba di delibera riba e tema aki. Di parti di autoridad Mericano, nada no a cambia pa loke ta e sancionnan aki. E ora loke cu nan a splica ta cu nan ta buscando otro manera pa yega na financiamento. E sancionnan di Merca ta afecta financiamento di e proyecto na Aruba, pasobra ta trata di un compania cu ta estableci na Merca, cu tin cu haci un fiansa grandi pa inyecta den e refineria na Aruba. Autoridad Mericano a haci mescos cu nan a haci cu otro companianan cu tin relacion cu Venezuela y esaki tin relacion cu Venezuela, a bisa cu si ta asina, no ta permiti e fiansa aki tuma luga, pasobra autoridad Mericano simplemente no kier pa mas placa wordo inyecta, ni den Venezuela, ni den companianan liga cu Venezuela.
E hecho cu e sancionnan ta afecta Citgo, ta pasobra nan a busca un financiamento cu ta cay bao di e sancionnan Mericano. Na e momento cu nan por haya financiamento otro caminda cu no ta via di Merca, e sancionnan di Merca no ta aplicabel. Por ehempel, si nan haya un financiamento via di Europa, un banco Europeo, e sancionnan cu Union Europeo tin riba Venezuela, no ta di tal indole cu ta afecta e compania Citgo. E sancionnan di Union Europeo ta riba individuonan, riba algun persona cu ta liga na e regimen di Maduro, cu unda cu nan tin placa of unda cu nan tin pertenencia mester vries nan. Pero no tin sancion contra companianan pa haci fiansa. Nan tin cu bay mira si nan ta hay’e di un otro caminda cu no ta wordo afecta pa e sancionnan.
Nan a menciona cu nan ta purbando pa negosha pa kita e sancionnan. Gobierno a bisa cu esey ta zona asina improbable cu bo no por tuma na serio. Asina ta miho cuminsa busca algo cu ta mas serio.
Citgo mes
E Citgo cu ta situa na Aruba cu ta afecta pa e sancionnan, tin di haber cu e hecho cu tin dos compania di Citgo. Tin uno cu ta cay bou di e taki di Delaware Company. Esaki ta cay e ora bao di PDVSA Holding di biaha. E ta un yiu di PDVSA Holding, y ta wordo afecta pa e sancionnan.
E otro Citgo cu ta opera na Merca, no ta un dochter venootschap di PDVSA Holding, sino un zuster venootschap. E no ta cay bao di dje directamente, sino banda di dje. Esey Citgo na Houston, no ta cay bao di e sancionnan. Citgo di Delaware si. Tin di compronde tambe cu eigenlijk, e tempo cu a negosha e contract, e integrantenan di gobierno anterior a scoge pa esaki, a sabiendas cu nan tabata deal cu PDVSA, pero mirando tur e riesgonan pa a deal cu PDVSA, a logra lanta un dochter venootschap di PDVSA, yame Citgo y deal cu esey.
Eynan autoridadnan Mericano ta bisa cu pa nan, ora cu ta un dochter venootschap, un compania cu ta un yiu di e compania madre, cu tin su accionnan den dje, e ora e ta cay bao di e sancionnan.
