Ministerio di Desaroyo Sosial, Labor i Bienestar (DSLB), den su empeño pa mehorá su servisionan, ta dirigí su mes direktamente na e habitante den bario.
Despues di un analisis profundo di datonan, Sektor di Labor a desaroyá 3 proyekto nobo pa e área di Bándabou. E proyektonan aki ta destiná pa baha desempleo bou di habitantenan di e área aki, alabes yuda e habitantenan kaminda e nesesidat real ta.
Ta trata di kurso di karpinteria, kurso pa guía turístiko pa varios área di Bándabou i kurso di kuido pa grandinan den área di Bándabou.
Kurso di karpinteria
E kurso di karpinteria lo dura 3 luna, 4 biaha pa siman. Kada lès lo dura 2 ora. For di 30 kandidato lo saka 10 kursista. Na final e kursista lo dominá téknika básiko di karpinteria. E intenshon ta pa na final e kursista por hasi trabounan di karpinteria den área di Bándabou riba diferente projekto.
Kurso pa guia turístiko pa Bándabou
E kurso di guía turístiko lo dura 7 luna. E ta destiná pa habitantenan di Bándabou.
Kada lès lo dura 90 minüt. Na final di e kurso e kursista lo dominá informashon kultural, i históriko úniko di varios área di Bándabou, lo e por komuniká mihó den varios idioma, krea kuenta kultural i tin un bon konosementu geográfiko, históriko pero tambe di medio ambiente uniko di Kòrsou. E kursista lo risibí un sertifikado si e
finalisá e kurso ku éksito. Tin lugá pa 15 persona despues di un proseso di preselekshon.
Kurso di kuido pa grandinan na Bándabou
A krea un kurso intensivo di kuido pa grandinan di área di Bándabou. Dies kursista di e área aki lo risibí lès durante 10 siman. Na final e kursista lo a atkerí abilidatnan manera komunikashon i abilidatnan sosial, mantenshon i limpiesa di kas, ayudo den kaso di aksidente/ emergensia (EHBO na hulandes), kon atendé ku malesanan chroniko ku sa presentá serka hende grandi, dieta, terminologianan básiko di medisina i diferente aspekto di tin un própio empresa chikí.
Ministerio di Desaryo Sosial, Labor i Bienester ta deseá tur kursista hopi eksto.
