Felicia Molina di Mamoticastraat, kende a haya problema e siman aki cu su nieta, a duna su banda di medaya. E nieta a acus’e di a rasc’e cu un cuchiu na su cara despues cu nan tabatin un discucion.
E problema a cuminsa despues cu el a lanta di un siesta. El a lanta despues di tende zonido duro. Y el a bin descubri cu e yiu di e nieta tabata bati cu un bat di baseball (di hero) riba e tegelnan den sala. “Esaki ta algo cu mi no a gusta y a kita e bat di baseball y tir’e patras di cas.”
E wela ta nenga di a choca su nieta. Unico cos ta cu el a bay defende su mes for di e nieta kende a bin ta push’e reclamando e forma cu el a actua cu e mucha.
Pa defende su mes, el a coy un cuchiu y a zwaai cu ne. Den e maniobra aki, el a rasc’e na su cara. Esey tabata momento cu e nieta a push’e y el a cay na suela.
E wela a conta cu na momento cu polis a detene, el a keda trankil pasobra e tin hopi Fe.
Tambe el a conta cu e cas tin regla cu nan tur mester mantene nan mes na dje. Asina e no ta permiti pa e muchanan yega despues di 8:00 PM. Asina mes e yiu menor cu ta hunga futbol un dia a yega den oranan di marduga. Hopi biaha e ta nieta ta bay sali of bay trabou y ta laga nan so na cas y sin ni bis’e pa tira bista riba e muchanan.
Su problema ta e forma nan ta bolter cos den cas. Y esey e no por acepta. Por ultimo, Felicia a bisa cu absolutamente e no kier pa e nieta su yiunan ta mas den su cas. Esaki tabata di cuater biaha cu e situacion ta escala, incluso a hasta yega di kibra glas di un porta. Nan a laga un desaster atras den su cas.
