Aruba a habri diasabra anochi cu un blackout cu a dura for di 8:12 pm pa 11:07 pm, pues un total di casi tres ora di paralisa henter nos economia y cambia agenda di henter nos pueblo. Pero mescos cu otro cuater biaha, nunca e companianan di utilidad ta sali pa splica na placa chikito, kico tabata motibo di e fayo y inconveniencia. Nan ta saca un comunicado “standard” pidiendo disculpa pa cualkier inconveniencia y cla, mañan ta otro dia y tur hende ta suppose di lubida.
Fayo sin consecuencia
A bira normal e ultimo añanan cu WEB y ELMAR deliberadamente ta opta pa no responsabilisa pa nan fayonan. Pueblo, esta clientenan, no tin otrol opcion toch, pues cu gusta of laga mester sigui paga WEB y ELMAR tur luna, sino nan ta corta bo suministro di awa of coriente. E posicion monopolistico aki a haci cu nan por tuma un actitud di no bisa nada despues di un blackout y cu speransa cu tur hende ta lubida lihe toch. Pero, e aña aki ta cinco biaha caba cu Aruba ta keda sin coriente y ta di nuebe biaha caba cu e ta sosode den e periodo di gobernacion di e gabinete aki, desde 2017.
Gerencia cu bon salario
Locual ta pone e clientenan disgusta mas ainda ta si considera e salarionan barbaro cu ta paga tur e partidonan envolvi. Por ehempel, director di WEB y esun di Utilities Aruba ta bay cas cu un salario mensual di 22 mil florin pa luna. Por lo menos asina e tabata anto. Riba dje, nan ta cobra 15 luna di salario pa aña. Na juni nan ta haya un “vakantie uitkering” di Afl. 25.080,= mientras cu na december nan ta cobra tres salario pareu, pues separa di nan salario di Afl. 22.000,= pa luna, nan ta haya un “bonus” di Afl. 44.000,=, pa hiba nan entrada mensual na december na Afl. 66.000,= den un solo luna!
Pa e articulo completo, lesa e edicion di TREMPAN di mañan mainta.
