Diahuebs 1:51 pm a registra un fayo den e suministro di coriente na diferente punto di Aruba. Momentonan despues e compania productor di coriente, esta WEB Aruba N.V. casi mesora a confirma cu ta trata di un blackout den henter e isla aunke ainda e origen di e fayo na prome instante tabata desconoci.
Informacion cu 24ora ta dispone di dje ta cu minuutnan prome cu e fayo di coriente a generalisa, ya caba area di Palm Beach rond di 1:24 pm cu a keda sin e suministro di electricidad. Durante e blackout a surgi problema cu coriente na aeropuerto y a paralisa tur operacion te cu a opta pa cuminsa evacua hende. Problema di coriente a conta igualmente pa SETAR, velocidad di su red di LTE a keda afecta.
Pa 2:22 WEB a indica cu e fayo a surgi den e planta nobo RECIP IV. WEB lo a cuminsa lanta produccion bek via nos otro plantanan di RECIP, boilernan y turbina di gas. E momento ey WEB a premira cu lo dura entre 1 pa 2 ora pa recupera 100% di suministro di coriente.
Pa 3:09 pm WEB a informa cu entretanto algun bario a cuminsa haya coriente bek. WEB ta suministrando coriente 100% na ELMAR y ELMAR ta reconectando e barionan riba e red. Barionan di Noord, Punta Brabo, Santa Cruz, Paardenbaai y aeropuerto ya tin coriente.
Pa 3:39 PM WEB a anuncia cu suministro di coriente ta bek 100 %.
