“Relaciona cu e publicacion di dia 7 di februari ultimo tocante mudansa di un departamento di WEB Aruba pa un edificio na L.G. Smith Boulevard, ta aclarea lo siguiente. E edificio ‘Bedrijfstechnische Zaken’ riba tereno di WEB pa algun tempo caba tin un problema cu humedad y schimmel”, asina WEB Aruba NV a informa awe contestando nos preguntanan haci for di ayera caba.
“Esaki no ta faboral pa salud di hende y ta obvio cu mester realoca e empleadonan en cuestion. Pa e motibo ey y tambe teniendo cuenta cu medidanan di precaucion pa cu COVID-19, gerencia di WEB a evalua diferente opcion pa un solucion. Finalmente a dicidi pa busca un localidad pa huur temporalmente”, segun gerencia di e compania nacional di produccion y distribucion di awa y coriente.
Pa WEB. e localidad mester a cumpli cu diferente criteria. E mester por a acapara tur e empleadonan di e sector en cuestion. Di e localidad lo mester por a yega rapidamente y facil na planta di WEB. Lo tawatin mester di espacio di parkeo amplio y mas importante ainda, e localidad lo mester tawatin un bon infrastructura di comunicacion y ta disponibel mesora. A acerca algun compania di real estate cu a bini cu diferente opcion y al final e escogo a cay riba e edificio na L.G. Smith Boulevard.
