E siman aki a habri cu director di WEB Aruba NV a manda informa e sindicato SIWA, cu ta representa e trahadonan di WEB, cu nan lo no sigui aporta na e fondo di FASE y consecuentemente lo stop di retene parti di salario di e trahadonan. Motibo cu e director, Luis Oduber, a uza ta pasobra otro companianan estatal no ta aporta toch den e fondo. Obviamente a tuma e decision sin consulta cu e doño di WEB, esta Gobierno di Aruba. No a pasa mucho dia cu e director a hay’e ta draai su decision bek y toch cumpli cu ordo di gobierno.
Den un mensahe di video na tur su trahadonan, Oduber, a informa di su decision pa reconsidera e posicion fuerte cu el a tuma contra maneho di Gobierno. El a argumenta cu despues di a reuni cu Minister di Finansa, mr. Xiomara Maduro, cu a inform’e cu tur compania a retene salario y algun a deposita caba den e fondo mientras cu otronan lo haci esey e luna aki ainda.
Gobierno a splica e director di WEB cu e companianan cu no a transferi ta pasobra nan a haya nan mes den problema serio di “cashflow” debi na e pandemia. Esey mes a haci cu a opta e ora pa mantene e suma reteni den caha di e compania mes, pa evita cu nan ta cay atras cu nan debernan financiero.
Awor cu e ta na altura di locual ta sosodiendo den otro companianan estatal, Luis Oduber a informa su coleganan cu WEB lo sigui aporta na FASE y consecuentemente e lo bolbe retene un parti di salario di trahadonan e luna aki pa sigui yuda esunnan cu a perde nan trabou den e pandemia.–
