Den cuadro di e maneho nobo di Ministerio Publico pa ataca benta di droga “por detal”, ultimo simannan ta nota cu ta teniendo varios razzia den diferente bario rond di nos isla. Diabierna anochi laat esaki a sosode atrobe, na un apartament situa na Boroncana # 133 na Noord.
A base di kehonan cu ta drenta di comunidad, relaciona cu molester pa benta di droga den bario, ta pone cu polis ta mobilisa su ekipo special anti-droga pa drenta e casnan aki y detene e sospechosonan. Awe nochi a detene dos persona den e apartament y a descubri varios tipo di droga den e cas. Tambe a nota cu a tuma un auto y un brommer den beslag na e sitio.
E accionnan aki tin algun siman caba tumando luga cu masha regularidad y ta anticipa cu lo sigui den e dianan nos dilanti. Meta di e accionnan aki ta pa kita mas tanto droga for di riba caminda y evita cu ta daña mas hoben, haciendo nan adicto.
