Diabierna anochi DOW a cera e caminda di Watty Vos Blvd entre Rotonde Wayaca y Rotonde nobo na Cumana dilanti Ex Codemsa. E motibo ta cu el a bira un peliger grandi pa trafico.
E awasero a causa cu camindanan a yena cu awa riba caminda. Esey nifica cu cierto auto no por pasa. E problema aki a presenta desde cu a traha e rotonde nobo. E ta mucho halto y e awa ta rondona tur rond y asina henter e area ta inunda. Polis a wordo notifica pa sera e caminda importante aki pa asina evita peliger a trafico.
Awor diferente negoshi eybanda por wordo perhudica pa e motibo aki. Aña pasa prome cu fin di aña tambe e caminda tabata yen di awa. E Minister actual Otmar Oduber encarga cu infrastructura a monta henter un show cu prensa y DOW cu e lo soluciona e problema pa semper. E problema berdad a disparce pasobra cu awasero a stop di cay durante aña. E siman aki e awasero cu a cay a causa inundacion confirmando cu loke e minister a bisa aña pasa no ta berdad. E contratista mester bay traha duro pa asina evita e tipo di problemanan aki mas caminda riba e ruta completo.
No ta solamente na Cumana pero na Madiki Kavel tambe a mira e caminda cu hopi awa sin cu ainda esaki ta den uso. A purba sera e caminda di diabierna anochi pa diasabra mainta. Si e keda mescos lo tene e caminda sera. Probablemente e contratista lo manda trucknan pa chupa e awa. Algo cu ya caba ta pasando.
