Awor ku Kòrsou ta sintá na mesa ku Hulanda pa porfin negoshá sierto ahustenan esensial den e CHE pa asina mihó protehá outonomia di nos pais, ta bon pa wak dilanti i analisá e CHE dor di un brel mas positivo i for di diferente ángulo. Mas positivo pasó por bisa ku e CHE ahustá lo bai tin un impakto signifikativo riba nos komunidat i ku e CHE lo bai garantisá desaroyo aselerá di Kòrsou den diferente sektor.
Esaki pasombra e CHE pa medio di un lei di Reino ta mara no solamente Kòrsou pero tambe Hulanda na ehekushon di un programa di término largu ku no solamente lo pone nos sobrebibí e krísis kousá pa e pandemia di Covid 19, pero tambe lo sòru pa despues di Covid lo tin e atenshon debido na e proseso di rekuperashon, reformashon i invershon den diferente sektor na Kòrsou inkluso e sektor sosial, di enseñansa i di infrastruktura. Esaki no solamente lo pone Kòrsou bek riba pia pero tambe lo pone Kòrsou bek riba mapa komo un isla importante den Caribe.
E motibu prinsipal ku e CHE lo garantisá un desaroyo aselerá di Kòrsou ta sintá den e echo ku e CHE ku pronto por bai wòrdu akordá entre Kòrsou i Hulanda ta hinká den un bachi di un lei di Reino. Esaki kiermen ku ni Kòrsou, pero tampoko Hulanda pa durashon di e akuerdo por bula for di akuerdo será pasó mester kumpli ku lei. E echo aki lo trese konfiansa i sertesa serka tur esnan enbolbí ku pa e próksimo 6 añanan, Kòrsou huntu ku Hulanda, lo mester ehekutá e akuerdo firmá sin niun di dos paisnan por desviá for di esaki. E CHE ku otro palabra ta un kompromiso a largo plaso ku un ehekushon garantisá. Defakto e CHE, unda sumanan astronómiko ta enbolbí, lo bai tin un impakto komparabel ku e impakto ku e ‘slotverklaring’ tabata tin entre 2006 i 2010, esaki espesialmente den nos ekonomia. Komparabel pasó nos tur ta kòrda ku for di e momento ku a firma e slotverklaring na 2006 – unda Hulanda a komprometé su mes pa no solamente koperá pa disolvé Antia pero tambe sanea e debe ku tabata kologá riba kabes di Antia – un konfiansa enorme a surgi serka invershonistanan lokal i internashonal. Nos tur ta kòrda ku dor di e invershonnan grandi aki nos ekonomia a haña un empuhe asina fuerte ku nos desempleo tabata histórikamente abou, plaka tabata lora na òrdu riba nos isla i hopi trabou sosial den diferente bario a wòrdu realisá. E antisipashon ta ku awor ku e CHE ta riba mesa – unda un biaha mas Hulanda ta komprometé su mes pa pone un kantidat grandi di plaka disponibel i e biaha aki hasta den un bachi di un lei di Reino – nos ekonomia i nos parti sosial lo haña e mesun tipo di empuhe formal aki. Algu ku sigur nos por uza pa pasa e periodo difísil di Covid aki i pa rekuperá despues.
