Presidente di Vereniging Rijscholen Aruba, Thomas Ruiz, hunto cu colega Wilfred Hart recientemente a presenta un charla riba e regla- y cambionan cu mester bini den trafico, esaki a tuma luga na Centro di Bario Playa Pabao.
Ultimamente Ruiz ta hopi den media pa vocifera su preocupacionnan entre otro riba loke ta comportacion den trafico. “Nos mester cuminsa conscientisa nos ciudadanonan riba varios aspecto riba trafico, e leynan nobo, y tin biaha tambe pa contesta pregunta pa yuda aclaria cierto cos.”
Ta haci un peticion na e otro Centronan di Bario pa tambe haci e iniciativanan aki. “Bo kier un siguridad den trafico? Esaki ta un bon iniciativa.” A yega di haci esaki na centro di bario Bubali y na organisacion OPPA. Ruiz a splica cu tin hopi plan riba mesa, pero mester warda kico lo bira decision di e mandatario encarga na momentonan aki. Kiermen mester warda kico ta e maneho cu e lo hiba, si lo bay inverti pa duna e tipo di charlanan aki.
HOPI PREGUNTA RIBA ROTONDE Y COMPORTACION
E topico mas papia tabata rotonde. Varios hende a haci pregunta tocante esaki durante e charla. VRA a contesta y splica hopi riba e parti di rotonde y comportacion di usuario den trafico. A papia tambe riba e parti di seguro di auto, con importante esaki ta pa tin’e bon regla entre otro. VRA tambe a presenta cifra di loke ta conoci pa loke ta e parti di autonan RHD, cuanto di nan ta envolvi den accidente. Y tambe splica riba kico ta opina di nan cual nos infrastructura no ta traha pa nan.
