Entrante dia 1 di juli 2021 a nombra dr. Viola Heutger como rector na Universidad di Aruba (UA). E ta tuma e funcion over for di dr. Glenn Thodé, cu desde aña pasa a dicidi di bay biba na Hulanda. Heutger tabata decano na e facultad di ley na Universidad di Antias, situa na Corsou. El a promove na aña 1998 na Universiteit Salzburg na Oostenrijk cu un tesis riba leynan laboral, specificamente riba diadomingonan liber.
Como docente y alabes gasthoogleraar, Heutger tabata envolvi tambe cu Universiteiten Utrecht, Maastricht, de Open Universiteit, de Vrije Universiteit Amsterdam, de Anton de Kom Universiteit na Paramaribo y e universidadnan na Wenen, Palermo y Pisa. Como parti di e flying faculty tambe el a sostene y creacion di e facultad huridico nobo na e universidad Turco Aleman situa na Istanboel, na e Universiteit Hasselt na Belgica y e Sigmund Freud Universiteit na Wenen, Oostenrijk.
Heutger ta un hurista y ta conseha den comisionnan di ley na Surnam, Corsou, Kosovo y na Polonia. E tin experencia den maneho como decano di e facultado huridico y den Hunta di Supervision di e German Seamen’s Mission. E ta representa e organisacion aki tambe den e International Labour Organization (ILO) na Genève. Den e tempo nos dilanti e lo enfoca riba acreditacion y pa garantisa e calidad di enseñansa na Universidad di Aruba.
Den e ultimo añanan a start cu algun proyecto interesante, manera por ehempel e SISSTEM cu sosten di Union Europeo. E lo sigui elabora y construi cu e mesun fundeshi estableci caba di renobacion y internacionalisacion.
Universidad di Aruba lo mester comberti su mes den e centro di conocemento di tur studiante di Aruba den e siguiente añanan, tanto na cas mes, online of cu ta den exterior.
Recientemente Heutger a cera conoci tambe cu minister demisionario di enseñansa, dr. Armando Lampe durante un reunion virtual. Den e reunion ey tabata presente, den nomber di e Colegio di Curatornan, Herry Koolman y Angelo Brete, den nan calidad respectivamente di President-Curator y waarnemend President-Curator.
