Despues di e incidente un poco mas cu siman pasa, awe berdadero habitantenan di Village a papia cu 24ora.com pa di e forma aki publicamente pidi nan disculpa na Cuerpo Policial y Cuerpo di Bombero.
Esaki relaciona cu un incidente bochornoso cu nan, como ciudadanonan berdadero di e bario no tin ni arte ni parte den dje. E habitantenan ta lucha pa tin trankilidad y union entre den e bario y cu autoridadnan. Tin cosnan cu a pasa cu nan ta desaproba completamente. Sra. Saya Brown, ta wordo considera controlado den e bario. El a cuminsa pa pidi dispensa na Cuerpo di Bombero pa e sucedido y cu nan mes como habitante no ta contento.
Tampoco ta contento cu e señora cu a duna un declaracion na 24ora siman pasa, cu hopi lke el a bisa no ta berdad, y mas pasobra e ta duna nan (e otronan) un mal imagen como mayor y educador. “E ta mustra manera cu nos ta di acuerdo cu loke wordo papia, y esey no ta asina. Mi ta un beheerder di e bario y tin añas ta atendiendo cu esaki, haciendo actividad pa muchanan. Ta lamentabel pa mira un grupo di mucha, y mas e mayornan,cu a yuda den un cos asina. P’esey nos kier a pidi nos disculpa pasobra ta trata di hendenan di un of dos cas y henter un bario a wordo culpa. Esaki no ta honesto tampoco.”
E ta lamenta cu autoridad a sali ta mustra di ta esun malo den henter esaki, siendo e no ta e caso. Tres dia prome cu e incidente, ya caba tabatin polis ta anda den e bario. E ta lamenta cu hopi mayor no sa con pa disciplina nan yiunan. Tur e dianan aki e muchanan ta montona hopi, di cual tin muchanan di otro bario cu ta bini. E ta resposabilidad di mayor pa adverti yiunan cu no por anda den grupo y evita di bishita.
Sra. Brown a bisa cu e problema tabata entre mayornan di dos cas hunto cu muchanan di otro bario (no Village) . E ta corda cu Polis a bini y a spart e muchanan cu a bay. Despues tabatin dos mucha homber cu a bini y despues a keda pusta boca cu Polis. Un funcionario so a baha y a atende cu e homber, cu a pone na vloer y bay cu ne. Loke cu a sosode eybou no tabata di henter e bario y tambe ora cu e candela.
Otro Beheerder, encarga cu e veld di basket ta Clyde Brown, kende tambe a pidi su disculpa ya cu loke cu a sosode no tabata na su luga. Ademas, e grupo sa cu no tabatin “samenscholing”. Loke cu a pasa cu e funcionario policial,e no sa pasobra e no a mira. Pero loke a pasa cu Cuerpo di Bombero e ta condena totalmente, pasobra semper e cuerpo aki a yuda e muchanan di e bario. “Nos sigur kier drecha e relacion, aunke esey lo no sosode di un dia pa otro.”
