Djarason dia 25 di apreil fondo di penshun Vidanova a selebrá su di 50 aniversario ku un resepshon na World Trade Center.
Entre e grupo grandi di wéspet tabatin representantenan di empresa i otro instansianan afiliá na Kòrsou, Boneiru, St. Maarten, Saba i St. Eustatius ku ta forma nan penshun na e fondo aki pa nan empleadonan. A hasi uso di e oportunidat aki pa anunsiá lansamentu di un entidat nobo: Vidanova Life.
E diskursonan di e tres oradornan huntu e anochi ei a tuma apénas 10 minüt. Presidente Anthony Haile di e Hunta di Supervishon brevemente a para ketu na lantamentu, struktura i e papel spesial di e hunta ku e ta presidí. Presidente di Hunta di Direktiva Humberto d’Abreu de Paulo a toka e strategia di IFS, esta ku banda di e penshun ta brinda un pakete mas amplio posibel di servisio finansiero integral. E pensamentu tras di esaki ta pa por duna e klientenan e servisio i produktonan nan ku nan por tin mester durante nan bida. Den esei ta inkorporá tambe e pasonan resien di Vidanova Bank. Djis despues direktor di Vidanova Charlène Alberto a anunsiá e ramifikashon nobo, esta Vidanova Life. Esaki ta un kompania di seguro di bida ku ku entrante dia 1 di yüni awor lo ofresé entre otro penshun individual i seguro di bida no solamente na esnan afiliá, pero tambe na hende privá. Den e tempu benidero lo duna mas informashon al respekto.
Na bieu na konopá nobo
Despues di e introdukshonnan remarkablemente kòrtiku i al kaso a laga e anunsio di Vidanova Life bai kompañá pa un show spektakular kaminda nan a kombiná bieu ku nobo. E grupo di baile di Cesario a bini ku e baile tradishonal di sinta, usando kabuya pa e okashon aki, siguí pa dos hóben di Cirque Magique ku nan kenshinan akrobátiko pa te na final e dos gruponan konopá e kabuya bieu na esun nobo. Simbólikamente nan a ekspresá ku riba e fundeshi sólido di 50 aña Vidanova ta sigui ku un brio nobo, konforme e dicho na Papiamentu ‘Na kabuya bieu … ta konopá nobo”.
