Durante debate den Parlamento, Premier Evelyn Wever-Croes a elabora con nan a haya e pais na momento cu a tuma over gobernacion.
“Locual nos a sinti ta un falta di confiansa grandi. Nos comunidad local a perde confiansa den e Gobierno di AVP, pesey 60% a vota contra AVP. Nos gremio sindical y gremio di comercio local a perde confiansa den Gobierno di AVP. Inversionistanan tabata disgusta cu e forma cu ministernan di AVP tabata pidi placa bou mesa a cambio di permiso.
Nos pueblo a perde confiansa den institutonan di Gobierno. CAFT no a controla gobierno manera mester tabata. Y pueblo a perde confiansa den nos Parlamento, pasobra e parlamentarionan di AVP cu tabata forma e mayoria, no tabata controla Gobierno manera mester ta. Y una bes bo pueblo perde confiansa den bo, ta hopi dificil pa bo gan’e bek. P’esey pueblo a pidi un cambio y nos a ofrece nos pueblo e cambio aki.
Internacionalmente tampoco tabatin confiansa mas den nos pais. Mi tabata na Merca fin di siman y mi por a nota cu institutonan manera IMF a perde nan confiansa den e gobierno di AVP. Otro instituto cu mi a papia cu nan a indica cu nan ta indigna pasobra sr. Eman a uza nan solamente pa “publicity stunt”. Hulanda a perde tur tur confiansa den Gobierno di AVP. Esnan cu ainda tabata considera sr. Eman como nan amigo, a keda defrauda den dje hasta bergonsa pa loke el a haci cu nos pais.
E CAMBIO CU LO TRECE CONFIANSA BEK
Bou di e circumstancianan aki, nos a haya nos pais. Un falta di confiansa den e weso di lomba di nos pais. Nos a cuminsa traha mesora pa reestablece confiansa. Y poco poco nos ta ganando confiansa di nos pueblo bek. Pasobra nos a mustra cu nos ta bisa loke nos ta haci y ta haci loke nos ta bisa. Nos ta demostrando cu hechonan cu nos SI ta carga nos responsabilidad. Y cu nos ta dispuesto pa para abuso contra nos pueblo.
Nos ta cuminsando cu dialogo cu gremio sindical, dialogo real na unda nos ta scucha nan preocupacionnan y bin cu solucion. Comercio local poco poco ta hayando confiansa bek pasobra nan ta mira cu tin esfuersonan real ta wordo haci pa trece desaroyo economico, pa kita e ‘red tape’ y burocracia, pa baha ‘cost of doing business’ y pa trece mas transparencia den e sistema di duna permiso.
Inversionistanan di afo ta haya mas confiansa pasobra awo tin reglanan cla y transparente cu nan mester atene na dje. Nan talves no ta di acuerdo cu tur e reglanan, pero nan tin hopi mas confiansa pasobra tin transparencia. Pa trece mas confiansa den nos institutonan di control, nos lo bin cu un Begrotingskamer cu no por wordo manipula manera Gobierno di AVP a manipula cu Caft. Y nos lo bin cu un Integriteitskamer pa duna nos pueblo e trankilidad di transparencia y integridad.
Nos Parlamento ta ganando e confiansa bek di pueblo cu un mayoria den Parlamento critico y bon prepara. E diferencia entre e Parlamento aki y esun anterior ta di dia y di anochi y esey pueblo ta mira y ta aprecia. Tur esaki ta treciendo bek e confiansa den nos pueblo.
Internacionalmente tambe mesora nos a cuminsa traha riba e confiansa. Na Hulanda nan ta realisa cu tin un cambio. Nan no ta confia nos ainda, pasobra e desconfiansa cu Gobierno di AVP y especialmente sr. Mike Eman a causa, ta grandi. Pero esey no ta stroba nos di sigui demostra cu hechonan, cu e Gobierno aki ta di confia.
Mi a caba di bolbe di un biahe cortico na Merca, na unda mi a reuni cu varios ehecutivo di State Department, IMF, Worldbank. E mision di e biahe tabata pa cera conoci y pa reestablece e confiansa. Y mi por bisa cu sigur nos a logra. Nan tin confiansa atrobe y tin hopi entusiasmo pa sigui traha cu Aruba y yuda nos caminda cu por.
Un ehecutivo di IMF a bisa den reunion cu locual IMF mas ta aprecia di Aruba awo ta cu algun aña pasa ora nan a reuni cu nos den oposicion, nos tabata papia e mesun idioma cu awo cu nos ta den Gobierno y hasta nos a cuminsa implementa pasonan caba den e direccion ey. Esey pa nan di IMF ta algo cu no ta pasa hopi. Asina poco poco pero sigur nos ta trece e confiansa y e speransa bek”, palabranan di premier, Evelyn Wever-Croes den Parlamento.
