Thomas Ruiz ta secretario di Vereniging Rijscholen Aruba, hunto cu Rolando Maduro, presidente di e asociacion, a presenta nan mes como representantenan, e voz di e Rijscholen y Rijinstructeurnan y a dicidi pa uni nan mes pa un motibo.
“Union ta crea forsa y asina nan por sinta tanto cu minister y Cuerpo Policial pa mehoracion di e examenrijbewijs,” Maduro a bisa. Hopi hende no ta compronde cu Aruba a sali for di un rijexamen centralisa pa decentralisa.
Antes tur instructor y rijschool tabata traha cu un buki blauw, crea pa stichting Verkeer. Mayoria di e rijscholen ta uza e buki aki.
Nan tabata tin e material caba cla unda cu ta prepara e personanan pa examen, basa riba e buki. Loke a pasa awor aki, e sistema nobo, a decentralis’e. Loke a haya aña pasa, ta un lista di e articulonan den ley cu e examen ta basa riba dje y di un forma of otro, e rijscholen mester traha nan material pa prepara e candidato pa examen.
Tabata tin un discusion grandi riba e manera con a introduci’e, pasobra cada rijschool por trah’e riba nan nivel, compara cu e miembronan di Cuerpo Policial ta prepar’e.
Danki na e union, a cera cabes pa purba di traha e material conhuntamente pa entrega un producto mas miho cu ta posibel. Prome cos cu a realisa cu e cambionan cu a bin den e leynan no ta tur a keda introduci den un solo biaha den e examen mes. Por ehempel e situacion riba mesa cu peaton. Despues a bin ley di telefon. Despues a bin leynan vigente pa tram, etc.
A palabra cu e materialnan nobo cu ta bin, sea ta introduci nan poco poco, of ta introduci nan di biaha. Loke a pasa ta cu a palabra cu ora nan ta bay introduci algo nobo, ta duna nan headsup y ta cuminsa prepara e hendenan pa examen. Pero a ripara cu awor aki desde cu salida di Alex Pieters, tin un otro persona cu tin e maneho eynan.
Segun Ruiz e scolnan ta haci nan best pa tin comunicacion. Si tin comunicacion cu e otro coleganan cu ta traha eynan. E problema cu e rijbewijs examen tin, cu nan ta hinca den un sistema triangulo. Tin minister, tin Cuerpo Policial y tin VRA. Varios biaha ta manda carta, ta sinta na mesa, pero ta ripara cu no tin adelanto.
Of un ta pasa riba otro, of un ta bisa algo, pero no ta cumpli of totalmente silencio. E barco asina, ta keda sink. Ta compronde cu falta personal y e tempo di espera ta cuminsa crece. Berdad a cuminsa bon. El a bay di casi un aña pa dos luna, pero tiki tiki ta keda schuif. Y si sigui asina e ta keda subi.
Sa tambe cu nan tin problema y principalmente Cuerpo Policial, nan ta na merced di e rooster di MFA. Ta depende tambe cuanto examen nan por draai pa siman y si tin luga na MFA. Sa si cu nan ta di bay den un edificio nobo cu ta na Doc Opleidingen, pero esey no ta concreto.
Tambe ta luchando pa hisa e calidad di e rijbewijs. Tin un averahe di 600 accidente pa luna, si ta bon y ta puntra pakico. Un cos cu por constata ora cu ta revisa e examen, tin hopi cos cu no ta wordo duna mas manera antes, por ehempel reverse. Helm tambe cu ta trece dilanti durante examen, tampoco no tin.
Tambe e calidad di examen, den e sentido ta cu antes bo ta djis memorisa un definicion di un borchi of un contesta di un borchi y b’a bay examen y a slaag. Pero compronde, no a compronde nada. Esey e rijscholennan ta cambiando cu conscientisando e hendenan cu no ta siña esaki pa e momento ey, sino ta algo cu bo ta keda cun’e pa bida largo.
Ken ta VRA
Pa bo pasa rijbewijs na Aruba, bo mester haya les y tin instructornan cu ta duna les pa por pasa examen. Tin tempo cu a pasa y VRA ta haya cu e pasamento y duna les a cambia. Ta bin mas tecnologia moderno etc. E scolnan tambe tin cu bay cu tempo.
Segun Maduro, loke ta pasa cu e pasamento di examen, tin hopi problema cu tin cu soluciona.
