Te ainda e trahadonan di Kong Hing Supermarket ta bibando den un incertidumbre mientras cu nan situacion personal ta birando mas penoso.
E unico carta cu nan a haya ta cu e empresa ta bay Corte pa pidi bancarota di e negoshi, pero no tin un decision riba esaki ainda. E empleadonan no a tende nada mas di doñonan. “Mientras cu nan no declara e negoshi bancarota, nos tin cu keda wordo paga.
Nos a presenta na trabou, pero nan no a habri porta y nos no a haya ni un depchi,” Ramiro Dubero, un di e empleadonan a bisa 24ora.com.El a agrega cu nan no por traha ningun caminda, mientras cu no haya retiro, sino nan ta perde tur cos.
Departamento Social ta spera riba e grupo di empleado diahuebs awo, unda lo pasa den e proceso pa haya abogado liber.
E empleadonan ta disgusta pasobra no tin placa pa esnan di Kong Hing Super Center, cu tambe tin nan gastonan, pero si tin placa pa paga esnan di wholesale.
Segun e empleadonan a splica cu nan a haya un carta dia 31 di december y despues di esey no a tende nada. Nan ta sinti tambe cu Departamento di Labor no ta brindando nan e apoyo necesario.
Tin empleadnan di masha hopi aña di servicio cu e compania, manera Alvin Dirksz, kende tin 23 aña cu e compania, kende a bisa cu e noticia cu el a haya tabata “manera un baño di awa friu ora cu a yega haya e porta cera”. E situacion tin’e hopi preocupa y ta pura pa yega na un solucion. “Mi tin hopi respet pa Farley pero mi no a spera cu e cos aki ta bay pasa.”
Linda Croes ta den e mesun situacion cu su coleganan y a expresa di ta decepciona den Departamento di Labor cu no ta yudando nan cu nada. “Nos tin cu nos cosnan di paga y nos no ta hayando salario. Mi famia ta yudando mi,” el a bisa. Esaki ta e situacion tambe di Milouska Hoek, kende ta hopi desespera. E ta su so y no tin placa pa paga su gastonan y no ta pagando su huur na FCCA. No tin manera pa haya placa.
E grupo di empleado riba diamars a dicidi di presenta na Departamento Social pa mira si nan por haya ayudo pa logra un Abogado liber cu por yuda nan haya nan salario y nan otro beneficionan.
