Un barco cu bandera Portugues a dal contra un barco di Guarda Costa di e Armada Venezolano y despues a bay mara na Corsou. Minister di Defensa di Venezuela a manda un comunicado cu ta rechasa e acto di agresion maritimo cu un barco di Guarda Costa Venezolano a sufri dialuna dia 30 di Maart. Esaki a pasa den oranan di madruga na un distancia di shete miya di isla La Tortuga.
Den e documento ta bisa cu pa 12:45AM ora di Venezuela, e barco RCGS Resolute cu bandera di Portugal a dal contra e patruya Naiguatá (GC-23). E accidente a pasa durante un proceso di control maritimo, unda a ocasiona “dañonan grandi,” segun e comunicado. Di e impacto aki, e barco Venezolano a sink. E Fuerza Armada Bolivariana a haci e trabounan di rescate.
E barco Resolute a viola e reglanan y convenionan nacional y internacional di e hurisdiccion di awanan Venezolano y den oranan di mainta a hancra na e waf di Willemstad, solicitando pa combustibel. For di Caracas presidente di Venezuela, Nicolás Maduro, a denuncia e acto di atake maritimo señalando “cu esaki ta un acto di pirateria internacional.” El a duna orde di biaha di resfuerso p’e protocol di fuerza naval den espacio Venezolano.Canciyer di Venezuela ta exigi e hurisdiccion di Hulanda pa haci un investigacion riba e incidente aki, pasobra ta considera esaki un violacion na e derecho maritimo internacional. E Ministerio di Defensa Venezolano a bisa di no a ricibi contesta di autoridadnan di Corsou. Pa loke ta e incidente cu RCGS a confronta cun’e, e investigacionnan ta andando na Corsou.
