Un grito di guera, cu parce tabata hogando. Un cabesaso di Jose Maria Gimenez den e di 89 minuut, a nifica e triunfo 1-0 di Uruguay contra Egipto. E Sur Americanonan a haya di ariba loke nan no por a logra riba veld. Un muestra di e gara “charrua”.
E Africanonan no por a conta cu Mohamed Salah, kende no a logra recupera fisicamente tras su lesion den e final di Champions League. No tabata e dia di Suarez tampoco di Uruguay. Pero na final, e push y e gananan propio di e celestenan a marca e diferencia cu un ingrediente propio di nan ADN: e bala keto y un wega aereo. E carta confiabe.
Egipto a haci tur cos bon. El a demostra cu e no a yega Rusia riba un paseo despues di 28 aña di ausencia den e mundialnan. Dirigi pa e Argentino Hector Cuper, manera cu nan a demostra den e amistoso contra Colombia, tabata hopi disciplina den e modulo tactivo y tabata bon para den tur su liñanan. Esey si, e portero Africano Mohamed El Shenawy tabata un di e figuranan di e encuentro tras un a salba di un bon disparo di Cavani y despues di a gana dos mano a mano cu Suarez. Essam e Hadary tabata suplente y e record di Faryd Mondragon, e hungado di mayor edad (43) den hunga un mundial, ta sigui.
Ora cu e holoshi a converti den un enemigo di e Uruguayonan, e gananan a aparece, e combate. E reconocido “garra charrua”. Y pa loke ta e final, Gimenez a bin cu e triunfo agonico na esnan dirigi pa Oscar Washington Tabarez, kende, na su 71 aña di edad, a converti den e di dos director tecnico mas bieu den historia di e mundialnan, trs di Otto Rehhagel.
Cu e triunfo aki, Uruguay a pone su mes na di dos luga den Grupo A, tras di Rusia, cu diahuebs a golea Saudi Arabia 5-0. Egipto a mustra cu e tin argumento y ta spera Mohamed Salah den e siguiente partido.
Siguiente weganan:
Pa 11’or di mainta (nos ora), lo tin e wega di Morocco contra di Iran y pa 2’or di merdia, e dos titannan di e peninsula Iberico, Portugal y Spaña, lo enfrenta otro. Tin cu remarca cu pa e di dos wega aki, tin hopi expectiva, mirando cu aki na Aruba, ambos ekipo ta faborito pa e mundial. En particular Portugal, debi cu no ta mucho siman atras, e hungado principal y capitan, Cristiano Ronaldo, figurando den Real Madrid, a hiba su partido na e victoria di Champions League. Awe merdia lo ta uno hopi interesante y sigur nos lo ta pendiente pa cualkier desaroyo.
Foto: FIFAⓒ
