Semana Santa ta un siman cu nos tur ta recorda e Pasion, Sufrimento, Morto y Resureccion di nos Señor Hesus Cristo. Kende a muri na cruz pa cada un di nos, pa pordon di nos pica. Y asina salbacion por a alcansa tur esnan cu ta kere den dje, segun ta para skirbi den Juan 3:16.
E siman aki nos kier hala atencion di tur hende mas cu nunca riba e gran necesidad di oracion cu tin riba nos isla, tur otro isla den Reino Hulandes, y tambe madre patria Hulanda.
Situacion dificil di COVID, situacion Social, Financiero, Famia, pero tambe e necesidad di Cristo den bida di hende. Pasobra tin hopi cos cu hende ta purba soluciona, na nan manera, pero si no tin intervencion di Dios e situacion no ta cambia.
Hopi biaha nos ta kere cu tur problema por wordo soluciona cu placa of cu separacion, of cu regalo, of cu libertinahe, paranda, bebemento, pero al contrario, e ta bira pio pasobra ningun di e cosnan ey no tin e poder cu Cristo Hesus por eherce den bo bida.
Cristo ta trece e renobacion di mente, cambio di pensamento, bida nobo, goso, paz, y e libertad cu ningun otro por ofrece. Cristo ta trece sanacion y liberacion, locual placa no por ofrece.
Bo no por reemplasa Dios pa placa, locual Dios por haci pa bo ta E so por hacie, E so por sostene bo y e lo calma bo curason.
E siman aki Diabierna Santo 2-4-2021 nos lo bay tin 9 Ora di Evangelio, Oracion y Alabansa, na bo Hit94FM for di 6am te cu 3pm. Ta un tempo cu nos lo dedica completo na necesidad di Aruba, un tempo cu nos lo trece tur peticion dilanti di tur hende, tanto den Hospital, Cas di Anciano, KIA, Muchanan den Imeldahof. Den un palabra bisa, henter Aruba lo wordo sacudi cu oracion p’asina por trece paz den cada cas y core cu tur tipo di spirito impuro, violencia domestico, rebeldia bao di hubentud, negligencia di muchanan, abuso di mucha, violacion sexual, droga, alcohol, etcetc. Lo tin un team bon prepara pa duna tur locual cu nan tin pa haci oracion pa e pueblo aki cu ta den gran necesidad.
Nos versiculonan cual lo wordo uza ta Mateo 11 vers 28 y Juan 15 vers 7. Nos lo haci oracion pa sanacion di nos tera di tur cos segun 2 Cron 7:14.
Pa 9 ora largo lo bay scucha e beneficionan cu bo tin den Cristo, e salbacion cu lo wordo ofreci na bo, con bo cas por ta liber di violencia domestico y bo yiunan por permanece den bon caminda. Pregunta lo wordo haci y pa e pastoornan por duna bon conseho y Speransa na e pueblo cu ta den necesidad.
Pasobra a yega e momento pa henter pueblo por uni den oracion, pasobra Dios mes a bisa : Cu si mi pueblo cu a wordo yama den Mi nomber humiya nan mes, haci oracion, y busca mi cara, y bira for di nan mal caminda , e ora ey lo mi scucha for di cielo, y lo pordona nan pica y cura nan tera.
Dios su promesa no ta cambia. Dios su palabra ta fiel y berdadero. Dios ta cumpli, y semper lo cumpli, pero e kier pa nos uni y diabierna ta un bon dia cu mayoria hende lo ta na cas y pa famia drenta den oracion y pidi Dios pa nos pais.
Nos ta kere cu nos tur hunto, cuminsando for di tur nos mandatarionan, tur esnan cu tin Aruba na curason, tur esnan den puesto halto. Tur Frontliners, tur polis, dokternan, enfermeronan y pueblo di Aruba lo uni den un solo oracion.
Pa haci peticion di oracion bo por manda email na: [email protected]
Pa haci donacion pa yuda nos cubri gasto di transmision yama of manda un mensahe na whattsup 7403237, y asina nos ta drenta den contacto.
Ban Uni den Oracion
Sinceramente
Pastor Marcel Balootje
