Marcelo Irausquin, cariñosamente yama Buchi a casa cu Sylvia Feliciana riba dia 25 april 1957 y for di nan a nace 7 yiu, cu esaki a yega na 19 nieto y 25 bisanieto. Buchi a nace den e bario di Brazil. For di jong caba e tabata labora den e mundo di construccion. Buchi tabata conoci pa hopi como un persona recto, estricto, perfeccionista, semper di bon curason y cla pa yuda tur hende.
Den su tempo liber bailamento tabata su pasion y Buchi a forma parti di e grupo di baile ‘Flor di Brazil’ principalmente bailando e musica folklorico y musica tipico di Aruba. Desde momento ey su amor pa caha di orgel a nace y asina a cuminsa toca su prome caha di orgel, cual coincidentemente tambe tabata yama ‘Sylvia’. Mas of menos 25 aña, danki na un bon amigo Patan Faro, el a logra yega na su propio caha di orgel, cual a wordo fabrica na Curaçao, unda tambe el a biba pa varios aña. E caha aki cu te dia di awe ta funciona y cu ta den bon mantencion yama ‘Nos Anarosa’. Cual a haya nomber di su nieta mas chikito e tempo ey.
Buchi hunto cu amigonan Jachi Maduro y Pablo ‘Paus’ Henriquez, conoci tambe como Torro di Westpunt den feliz memoria, riba wiri tabata toca e caha ‘Nos Anarosa’ den Festival di Bon Bini, un festival popular tanto pa turista y hende local. Banda di esaki e tabata tin e honor di toca na varios actividad cultural. Buchi tabata un hende devoto na Iglesia Catolico y desde cu e tabata biba den e bario di Santa Cruz el a cuminsa yuda durante sacrificio di misa haciendo trabao di colectant. Tambe tabata maneha e yabi di santana y mainta tempran prome cu e Misa di Aurora e tabata cana bay pa habri porta di misa y bati klok di misa.
Mas of menos 4 aña pasa a constata e malesa di Alzheimer cerca Buchi y desde e tempo aki pocopoco no por a sigui cumpli cu su trabounan pa comunidad. Dia 24 di februari 2022 Buchi a cera su wowonan y a bay sosega y asina a bay laga e famia atras cu hopi recuerdo.
Director, staf y personal di DCA ta expresa palabra di condolencia y forsa na su casa Sylvia, su yiunan, nieto- y nietanan, bisnieto- y bisnietanan, famia Irausquin, Feliciana, demas famia, amigo y conocinan, y su coleganan di Caha di Orgel.
