Dialuna anochi a nota e grupo di candidata pa e eleccion di reina di Colegio EPI ta train riba Plaza Betico. No a duda y a acerca nan mesora. Miembro di comision organisado, Marielle Thiel a conta cu, e candidatanan ta preparando un parti di e show y cu casi tur cos ta cla pa cu e eleccion.
E eleccion e biaha aki ta premira di ta uno mas grandi aun. Colegio EPI ta den su aña di celebracion den cuadro di e di cinco lustro di e scol. Ki manera mas bunita pa sigui cu e celebracion organisando un eleccion di reina. Pa e materia di Bewegingsonderwijs (BO), e studiantenan tin como tarea pa organisa e eleccion di reina, como meta pa recauda fondo pa un studie reis pa New York cu lo tuma luga den luna di februari. E ta mas bien pa siña mas riba e tereno di ‘Organisatie en Leiding.’
E eleccion di reina di Colegio EPI, organisa pa e studiantenan di BO-Groep lo tuma luga diasabra awo 14 di januari 2023 den Entertainment Center. Porta lo habri pa 6:30 pm y show ta ranca sali pa 7:00 pm. Por cumpra bo ticket na CITGO Essoville of Boulevard pa solamente 12,50.
E candidatanan ta entusiasma pa dia di eleccion. Nan trahe lo ta uno di material recicla. E eleccion ta conta e biaha aki cu dos categoria: Studiante y Docente.
Recientemente a trek lot y aki ta sigui e secuencia;
Pa categoria di studiante;
1. Heily Giel
2. Jennely Winklaar
3. Ariadna Harewood
4. Judienne Celaire.
Pa categoria di docente;
1. Geraldine Shera Albertsz – Unit Salubridad y Servicio.
2. Rosmery Rondón cu lo representa unit Economia.
Marielle Thiel di BO-Groep a invita e pueblo pa sostene nos candidatanan y cumpra Bo ticket n’e puntonan di benta menciona mirando un gran show cu lo tin diasabra awo y yuda e studiantenan di BO-Groep cumpli cu nan meta.
