Despues di un aña y mey cu a haci e prome entradanan hudicial, autoridad a cuminsa haci prome e prome detencionnan den e caso Avestruz, den cual ex-minister Benny Sevinger ta e sospechoso principal. Awe miembronan di Lands Recherche y Recherche Samenwerkings Team (RST) a detene e dama Rebecca R., yiu di un otro sospechoso, Leoncita Arends, den e mesun caso aki.
No ta conoci cuanto detencion mas tin pero diadomingo atardi ta basta miembro di Lands Recherche tabata riba pia trahando overtime pa asina pusha riba e detencion entre otro na aeropuerto. A detene e hoben aki, net na momento cu el a yega Aruba bek for di un biahe. Su nomber tabata pone den e sistema na Migracion, pues asina cu el a yega Aruba a activa Lands Recherche cu a bay busc’e.
E caso avestruz
Ministerio Publico a informa dia 2 di october 2019, dia cu a haci e huiszoekingnan, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro hechonan castigabel posiblemente cometi relaciona cu otorgamento di terenonan di gobierno.
Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017. Ademas ta investiga e rol di ex-minister Benny Sevinger den esaki.
Entradanan hudicial
Riba e prome dia di entradanan hudicial, a start e dia na cas di ex-Minister di Infrastructura Benny Sevinger y asina despues a sigui pa cas di Leoncita Arends; Gaby Werleman; Freddy Every; Oficina politico di Benny Sevinger; cas di Neme den Bachstraat; cas di Neme na Palm Beach y oficina di Neme na The Village. Pues en total 9 entrada hudicial for di 7:00 am te cu 4:30 pm, bou guia di Fiscal mr. Yolanda Pronk y Hues Comisario mr. Sap, den combinacion cu funcionarionan di Landsrecherche y RST. Tambe a haya ayudo di funcionarionan di Hulanda, mirando e cantidad di personal necesario pa haci tur e trabou aki.
Mas entrada hudicial e aña aki
Autoridad dia 13 di januari 2021 a lanta marduga pa haci algun entrada hudicial na diferente adres. Famia Susebeek na Esmeralda, na Noord a haya bishita prome cu solo a sali. Ta link e comerciante Pieter Susebeek cu ex minister Benny Sevinger den e caso Avestruz. Probablemente ta tratando di haya pruebanan pa purba link e ex mandatario na actonan ilegal durante gobernacion di AVP.
A drenta e cas na Esmeralda y e oficina La Hacienda situa na Coral Plaza. E famia aki tin varios propiedad y ta conoci den negoshi di Real Estate. A tuma varios ora den e cas y oficina cobando y analisando documentonan. Tambe a mira con ta coba den auto buscando documentonan. Separa di cas di famia Susebeek, a bishita cas di ex Minister Benny Sevinger atrobe na Paradijswijk. Esaki ta di dos biaha cu ta bishita e cas. E prome biaha a bay cu varios caha di documento. E biaha aki a bay cu e telefon celular di casa di e parlamentario.
A drenta trustkantoor na Aruba y Corsou
Dia 1 di februari ultimo a drenta un Trustkantoor di famia Looman situa den Belgiestraat na Aruba y otro situa na Corsou. A confisca cierto material den ambos entrada hudicial entre Aruba y Corsou. Ta purbando pa yega na evidencia den cual por demostra cu lo tin bendemento di tereno, di forma ilegal, den cual pais Aruba ta sali victima.
Abogado: No por bisa nada ainda
Abogadonan mr. Suhaila Arendsz y mr. Desiree Croes ta forma e ekipo di defensa di e sospechoso. Nan tabata presente durante e prome interogacion na oficina di Landsrecherche situa riba Vondellaan. Pafo nan no por a duna mucho informacion riba e caso aki, debi cu apenas a detene nan cliente. Nan a djis confirma cu nan cliente ta envolvi den e investigacion conoci como Avestruz. Mas informacion riba e caso nan no por a duna, pasobra te ainda no e detayenan no ta disponibel pa e ekipo di defensa.
E sospechoso Rebecca
Ministerio Publico ta sospecha cu Rebecca R., siendo yiu muhe di Leoncita Arends, lo tin di haber cu cumpramento y bendemento di terenonan comercial. E tambe ta un sospechoso den e caso, debi cu e tambe lo a haya tereno riba su nomber y despues bendenan pa construccion di edificionan comercial. Mirando su edad hoben, ta sospecha cu e lo por ta un “front” pa otronan den e negoshi di compra y benta di terenonan comercial.
