Turista cu a hera hoga: Mi a mira Dios mi dilanti

10020

Un bishitante di Aruba cu a bay disfruta di e lama di Aruba na San Nicolas a haya su mes den problema den awa. Pero na final el a logra sali bon di e situacion.  

Segun informacion ricibi, awe den careda di 10’or di mainta e turista Mericano a confronta problema riba lama na momento cu a bay patras di e boei pa snorkel y no por a bin bek aden. Esaki a sosode den area di Baby Beach. Manera ta conoci, e area entre e dos rifnan ta unda cu diferente coriente di lama ta topa otro y pa esnan cu no conoce e situacion, e ta bira un peligro grandi.

Personanan mirando loke ta pasando a bati alarma na Polis pa yuda saca e persona for di awa. Un persona local cu a mira loke ta pasando a bay yud’e y a trece tera. Segun e turista a conta, el a bay completamente for di tino y a mira Dios y su yiunan su dilanti. El a expresa hopi gradicimento na e cabayero Jessi cu a dun’e un man mesora.

No tabatin mester di ambulance, ya cu e tabata sinti su mes bon.