Prijs di gasolin ta sigui subi

3083

Minister di Finansas, Asuntonan Economico y Cultura, mr. Xiomara Maduro a anuncia awe aumento den e prijsnan di benta di combustibel entrante 12 di augustus 2020. Gasolin unleaded-premium ta subi na 178,1 cen p/ltr. (+ 3,2 cen); Diesel ULS ta subi pa 140,7 cen p/ltr. (+ 5,7 cen) y Kerosin ta bira 122,9 cen p/ltr. (+ 5,0 cen). E prijsnan ta inclui BBO/BAZV/BAVP.

E privilegio di e caida grandi den prijs tabata dos biaha so e ultimo aña aki. E ultimo biaha cu prijs di gasolin tabata na e nivel cu el a baha luna di mei, tabata na januari 2009, ora cu el a yega 141.4 cen pa liter. Esey tabata un luna sporadico cu prijs a baha drasticamente y su siguiente luna a subi pisa atrobe. E tempo cu prijs tabata na e nivel ey tabata na februari 2004 ora cu gasolin tabata costa 144.2 cen pa liter y a wanta asina algun luna prome y despues ainda.

Pues pa loke ta e aña’ki, luna di mei tabata e miho luna pa consumidornan, ora cu e prijs di gasolin a baha cu casi 16 cent. Den e lunanan cu a sigui, na juni el a subi bek cu 15.8 cent, na juli cu 14,4 cent y awo na augustus cu 3.2 cent pa yega na e tarifa di 178,1 cen pa liter, cual ainda ta un poco mas abou cu e tarifa di aña pasa.