Ta parce cu e maneho na Departamento di Infrastructura y Planificacion (DIP) ta cambia constantemente pero awo tin un proyecto multimiyonario secuestra! Despues cu e mesun director di DIP, ing. Haime Croes, a otorga permiso pa traha un tunnel pa conecta hotel na beach na 2019, laga e compania haci un inversion grandi pa esaki, awo ta bisa nan cu a cambia di opinion y nan no por haya e beach mas. Esaki mientras cu Divi Resort, bisiña di Embassy si a haya dicho permiso y awo a pidi pa ampliacion tambe.
Kico falta
Entretanto e hotel ta cla y a cuminsa ricibi huesped caba. Pero, for di e prome plan di negoshi, aproba pa Gobierno di Aruba y revisa pa tur departamento, entre otro DIP, semper a inclui e beach como parti di e proyecto. Consecuentemente, tur bende y promocion di e hotel internacionalmente, a inclui e beach. Pero, e realidad ta cu ey no tin beach. Pues no ta cuestion cu lo kita nada, sino riba propio costo di Natura Developments, lo traha un beach riba cual por pone stoel, palaba y un beach bar pa ofrece servicio di huur serbete y alimentacion na e huespednan. Pero for di lunanan caba, a bati porta na tur departamento, na tur minister y pa un of otro motibo, a opta pa unanimamente boicotia e proyecto y pone e inversion na peliger!
Gabinete Wever-Croes II ta sinta cu man crusa
No ta cuestion cu Natura Developments ta un inversionista nobo pa nos isla. Nan a desaroya diferente proyecto y esaki ta nan di tres proyecto di condominio hotelero, pero si esaki t’esun di mas grandi. Riba dje e pandemia a causa tardansa enorme, cu consecuencia cu mester a haci un fiansa extra, haciendo cu e proyecto na final a surpasa 120 miyon florin. Cualkier inversionista lo a core bay, pero e grupo aki, cu tur confiansa den Aruba, a opta pa haci nan “exposure” mas grandi y asina a demostra di ta kere den e proyecto aki. Ora nan a bati na porta di tur minister, pidiendo pa ayudo debi cu DIP tin e proyecto stanca, tur ta priminti y lubida. Ta obvio cu Minister Presidente, cu alabes ta encarga cu maneho di infrastructura, deliberadamente ta opta pa sigui pone man riba cabes di e director di DIP, aunke cu hasta hues ta cuestiona su forma di maneha y tuma decision.
A subi trapi bay hues
Mirando cu e proyecto ta cayendo atras den su huespednan debi cu no por cumpli cu nan promesa di tin un beach inclui na e hotel, Natura Development NV (e demandante), a opta pa dia 16 di maart 2023, pa pidi corte p’e tuma un medida temporal contra esaki. Corte di su banda a concede un audiencia pa un caso sumario riba dia 12 di april 2023. Ey abogadonan di e grupo cu a inverti mas di 120 miyon florin den nos economia, a haya chens pa splica e hues administrativo di con nan ta sinti cu Gabinete Wever-Croes II no ta tratando nan husto y mas bien a cambia di posicion contra e proyecto. For di otorga nan tur tipo di permiso y cooperacion pa construccion di un hotel luhoso, diripiente a cambia y ta haci tur lo posibel pa stroba nan yega na nan beach, cu e mesun Gabinete Wever-Croes I a otorga nan na aña 2019!
Kico ta e disputa
A concede e demandante un pida tereno di 18.144 meter cuadra como erfpacht cu e meta pa construi, pa por tin y pa por explota un edificio di condominio te cu 20 unidad, anexo cu e servicionan asocia y instalacion recreativo (proyecto hotelero), conforme cu un plan di desaroyo aproba pa Departamento di Obra Publico (DOW) y e permiso di planificacion cu lo a emiti.
Dia 8 di november 2018, e compania a presenta un peticion pa ocupacion di (parti di) e terenonan situa dilanti di e proyecto hotelero, pa nan por construi of amplia e beach dilanti nan hotel. A pidi permiso pa proporciona e instalacionnan di beach necesario n’e huespednan di e hotel y e construccion di un tunel subteraneo pa crusamento sigur di e huespednan di e hotel p’e beach.
Flip flop: E mesun DIP a cambia di “maneho”
Mediante di dos carta fecha dia 25 di october 2019, director di Direccion di Infrastructura y Planificacion (DIP), a notifica e compania cu nan ta di acuerdo pa amplia e beach y pa ofrece facilidadnan riba e beach aki n’e parti west/zuidwest di e percela en cuestion. A informa e compania cu solamente lo por concede un permiso pa tur actividad cu ta portatil. Baño, por ehempel, mester ta maneha door di DOW.
Dia 19 di augustus 2022, e compania a presenta un peticion pa concede un permiso di contruccion cu lo permiti nan pa amplia e beach di e luga depositando santo riba dje. Pa medio di un carta fecha dia 4 di october 2022, e compania a reitera e peticion aki. Pero gobierno (Ministerio di Infrastructura), a nenga e peticion aki, alegando cu solamente propietario di e tereno den e caso aki Land aruba por presenta un peticion.
Locual Corte a evalua
E demanda haci di parti di e compania ta exigi pa concede e permiso di construccion solicita pa amplia e beach situa dilanti di e proyecto hotelero of pa ordena gobierno pa amplia dicho beach den e plaso di dos siman p’e compania por ofrece instalacion di beach na su huespednan. Pero pa por tuma un medida, entre otro cos, esaki mester tin un caracter temporario, miho bisa, mientras cu e procedemento riba e caso den bodemprocedure ta tumando luga. Corte di Prome Instancia ta haya cu no por considera e medida pidi p’e compania como un di caracter temporario.
Corte ta evalua, loke e demandante ta pretende pa logra mediante di e caso sumario ta di tal alcance cu ta excede e ambito di e actual procedemento riba e medidanan temporario. Cu esaki a tene cuenta tambe den bista cu ta considera mas dilanti relaciona cu e cuadro di baloracion cu mester aplica pa evalua e peticion di e permiso di construccion, te asina leu no tabata creibel cu gobierno no tin mas opcion cu otorga e permiso pidi. Esaki ta rekeri un investigacion profundo, pa cual e procedemento di e compania den Corte Civil ta ofrece un oportunidad ideal. Den cuadro cu a pidi pa ordena gobierno pa amplia e beach, ta referi esey na un acto haci cu ta keda for di e ambito di e procedemento administrativo, cu, al fin y al cabo, ta limita p’e decision cu por tuma. Como consecuencia, a nenga e peticion aki.
Pa mas lesa TREMPAN.COM
