Siman pasa diahuebs anochi, den careda di 7:45 911 a haya yamada for di Havenmeester, cu tin un situacion riba un barco.
Sharline Koolman, hefe di e departamento di malesanan contagioso ta sigui conta cu e barco mes no ta destina na Aruba, sino pa Mexico, di cual a pasa na varios puerto di Africa. Tabata tin un persona abordo cu ya pa algun dia caba tabata birando mas y mas malo.
Tabata hayando asistencia for di tera, pero e situacion no tabata bayendo bon. E persona tabata birando cada biaha mas malo y a dun’e diferente tratamento abordo, pero no tabata dunando resultado.
A base di esey a meld na Aruba cu si nan por drenta pa baha e persona. E intension tabata pa nan sigui nan destino, mirando cu nan tin carga pa entrega. A base di esey havenmeester a meld esaki y wak kico e situacion lo bay bira.
Na su turno, brandweer a meld na Departamento di Salud Publico, manera cu e structura ta exigi. Tur a cumpli cu nan parti. A base di esey, ora cu Koolman a wordo poni na altura, el a haci e partinan cu DVG mester haci.
Rampenbureau tambe a wordo informa kico lo ta e miho manera pa atende cu esaki. E ora ey a dicidi miho sinta un rato hunto pa wak for di e structura di calamidad, con por coordina esaki mas miho.
No ta solamente e structura di calamidad, esta ora cu tin un horcan of cosnan asina, pero tambe pa structura cierto atencion cu tin cu duna.
Pa DVG e parti di Rampenbureau ta infectieziekten. Na momento cu tin di haber cu un malesa contagioso y den e caso aki e tabata asina abordo di e barco, kier tabata sigur cu ta algo cu Aruba no por deal cun’e.
A tuma contacto cu un internista di hospital, pa wak kico nan ta conseha cu lo ta mas miho pa haci. Hunto cu e management team di DVG a dicidi cu lo tabata mas miho pa pone un team medico abordo di dos verpleegkundige cu tabata di departamento di malesanan contagioso y e internista infectologo, pa asesora, wak kico ta pasando abordo.
No solamente cu e pashent en cuestion, pero tambe cu e otro miembronan di e tripulacion, cual tabata 11 persona.
Kier a wak kico ta e situacion. Esey ta e manera cu tin cu deal tambe. E no ta pa haci ningun upscale di biaha, pero ta e manera mas miho cu ta train na Aruba pa deal cu tipo di situacionnan aki. A base di esey, polis tabata tey acerca. Brandweer a yuda mas bien cu e parti di contact cu kustwacht, e parti cu APA, e coordinacion di e pidanan ey. Koolman a percura mas pa e atencion medico. Polis tabata tey cu si mester a pone un teritorio etc.
Pa e motibo ey mester a sinta hunto. APA tambe y havenmeester, kustwacht mesora e momento cu nan a wordo yama pa asisti y tuma e team medico y hiba nan riba e barco pa wak kico ta e situacion. Esey tambe a bay hopi bon.
Mesora nan a duna tur cooperacion. Despues a haya un yamada di personal abordo cu e persona por baha, cu ta algo cu Aruba por deal cun’e. Ta un infeccion cu nos tur na Aruba por haya.
A base di esey dokter a bisa cu ta algo cu ta atende na Aruba regularmente y cu no lo pega nos comunidad of pone nos hospital na peliger.
Kier a exclui esey y door cu esey tabata e caso, e persona a wordo baha for di e barco cu un crane di e barco mes den un di e botonan di kustwacht y kustwacht a trec’e aden. Ambulance a tum’e over manera cu a prepara tambe. Ambulance tambe a duna su bon cooperacion y nan a transport’e pa hospital.
Hospital tabata full prepara pa tum’e tambe. Laboratorio a atende cu e pashent tambe mesora. Tin cu bisa cu tur esnan cu a coopera e anochi ey, pasobra keda mas of menos te cu 2’or di marduga riba pia. Pero el a bay hopi bon segun Koolman.
Tambe Maduro & Sons cu tabata e agencia di e barco aki tambe a duna su cooperacion pa esaki. Ta gradici for di DVG tur esnan cu a coopera.
DVG ta hacie no solamente pa train, pero tambe pa ora algo mas grandi sosode, tur hende sa caba nan rol kico nan tin cu haci.
Esaki a tum’e como un ehempel cu tabata un persona, pero por tabata mas persona abordo. Esey kier a limita.
