Pasco mainta, algo prome cu 9’or, Parkrangernan di Parke Nacional Arikok a wordo notifica di un persona herida den Parke, na altura di Shete, riba e caminda pa bay Conchi.
Ora a yega, nan a topa berdad cu un persona herida y el a bisa cu el a cay, herida su mes. E auto di e persona tabata un poco mas p’ariba pega den baranca. Parce cu e persona aki lo a bira malo. Ta wordo menciona cu el a bay saca potret den area, e auto a pega den baranca y despues di esey, ora el a bay cana eybanda, el a cay y herida su mes malamente.
Tin ta bisa cu el a bira malo, cay herida su mes, su wowo a bira. El a coy caminda di Shete pa bay Conchi cu un auto cu no por yega eynan, of no ta facil pa pasa den e caminda malo pa Conchi for di Shete.
E auto tabata kibra. E tabatin basta sla na dje pega riba baranca. Personal di ambulance a yega y a topa e homber algun 100 meter leu for di e auto. Paramediconan a dun’e asistencia. Polis tambe a papia cun’e y a wak e situacion. A hiba e victima pa dr. Horacio Oduber Hospital pa un checkeo medico mas avansa y tambe pa atende su heridanan.
Takelwagen a keda di bay busca y saca e auto den e situacion cu e tabata aden na Shete y tambe Forensys a wordo pidi pa presenta pa atende asunto di seguro.
