Tur cambio haci na e aeropuerto chikito ta pa mehora servicio na e cliente

Lorena Fuentes ta general manager y encarga cu W-Aviation cu ta e general aviation na Aeropuerto di Aruba. Esey ta e aeropuerto priva banda pazuid.

Durante entrevista Lorena Fuentes a splica riba e servicio cu nan ta dunando. Manera ta conoci e aeropuerto parti pazuid tin un maneho nobo. Aki a splica kico tur ta pasa e maneho y cambionan haci pa ricibi e vuelonan priva cu servicio VIP.

 

E ta conta cu dia 1 di Januari 2018, W-Aviation a tuma over. E ta un acuerdo cu tin cu aeropuerto y a inverti hopi den e renobacion. E edificio a wordo renoba completamente. E ta un cambio grandi.

Ainda nan ta den un fase di cambio cu lo bay bin pafo tambe. Ta bay bin cu un cafe nobo. A haci tur e renobacionnan aki pa por duna e clientenan un servicio mas agradabel. Pero tambe mester enfoke riba e clientenan cu ta hopi importante di gobierno cu ta bin. Nan tin airambulance cu ta bin tambe. Vuelonan militar tambe.

Nan ta ricibi avionnan mediano y avionnan grandi cu ta bin bishita. Nan ta specialisa den duna e miho servicio na e clientenan.

Nan ta manera groundhandling, pero ta un aeropuerto chikito, pero tin e servicionan di concierge. Ta haci servicio di catering, tur areglo di hotel, transporte luhoso y tambe tur loke ta siguridad riba rampa, ta entre otro servicionan cu nan ta duna.

Destinacion

Na cuminsamento, Venezuela tabata tin mas avion na e aeropuerto. E ta un mercado importante pa W-Aviation. No ta un secreto cu tin hopi inversionista Venezolano na Aruba. Nan tin nan mesun avion y ta bin na Aruba p’esey. Actualmente, door cu e frontera ta cera, esaki a baha un tiki di e mercado cu tin di Venezuela. Pero a probecha di mercadonan manera Merca y Brasil. Brasil ta den mira pa bira un mercado importante.

Caida den porcentahe

Awo cu e frontera ta cera, segun Fuentes, ta un calculacion di un 45% di vuelo cu tin pa e luna aki. Ta purbando pa haya un acuerdo cu e pilotonan Venezolano pa ora nan por bula pa bin via Colombia pa Aruba. Tambe ta purbando di haya mas trafico cu lo bin di Brasil of Argentina, di Colombia y di Merca, cual ta nan mercado principal.

W-Aviation ta duna servicio completo di Groundhandling y VIP. Nan ta atende e avion completo na tera. Nan tin un servicio di hotel. Nan tin clientenan importante, manera companianan grandi di Merca, cu ta bin cu nan clientenan cu por afford pa nan por paga un charterflight of nan tin nan avion priva, e ora nan tin mester di un servicio luxury.

W-Aviation tin un customer service cu a wordo entrena pa esaki. Nan a paga nan entrenamento di nan hendenan tambe, pa nan por asina atende e clientenan VIP na un manera cu nan mester wordo atendi.

Fuel

Fuentes a conta cu W-Aviation ta fuel cu FMSA, cual ta e unico compania cu ta fuel na Aruba. Ya caba nan a cumpra dos truck di fuel. Den un futuro cercano nan ta sigui cumpra fuel di FMSA, pero nan mes ta bay duna servicio di interplane. Esey ta nifica cu W-Aviation mes ta bay fuel e avionnan, cual ta haci cu e servicio ta bay bira hopi mas rapido y mas VIP pa nan tambe. Pasobra nan por yega fuel y sigui bay otro caminda of ta haya e fuel manera ora cu nan tin mester.

Tin biaha ora cu ta druk na commercial site, nan tin cu warda hopi pa fuel. Esaki ta haci cu nan servicio por ta un tiki den duda. Door di esey a bin cu inversion grandi pa cumpra nan propio truck di fuel. Nan lo duna jet y tambe afgas na tipo di avionnan cu mester otro tipo di fuel. Esey ta bay haci cu nan servicionan ta bay bira hopi mas lihe tambe.

Escala pa fuel

Segun Fuentes, W-Aviation tin pensa den futuro probecha e oportunidad pa bay den un direccion pa uza Aruba como un fieldstop. Esey ta yuda tambe pa por trece mas mercado na e aeropuerto y ganashi pa nan tambe. Esey no ta nifica cu e avionnan cu bin for di Latinoamerica, por ehempel Brasil, ta para na Aruba fuel na Aruba, sigui bay Merca of otro destinacionnan cu nan tin tambe.

Acuerdo cu aeropuerto

W-Aviation tin un acuerdo cu aeropuerto, cual nan ta respeta. Tur avion cu ta di general aviation of avionnan priva, tin cu baha na nan facilidad. Nan ta respeta esaki. Nan tin un acuerdo cu aeropuerto tambe, cual ta aproba pa nan y ta traha en conhunto cu nan. Nan tin bon relacion cu aeropuerto y ta trahando hopi bon cu nan, segun Fuentes.