Alumnonan di Universidad di Aruba cu donacion na Fundacion Respetami

Alumnonan di e facultad di hospitalidad y turismo di Universidad di Aruba, a haci entrega di un donacion. Sophie Diane Donker, studiante di e facultad aki a splica cu nan tabata tin un proyecto cu ta uni nan vaknan na scol cu yama MICE (Meetings and Incentives convention and Events) y mester a organisa un evento pa un organisacion sin fin di lucro na Aruba.

Despues di a busca hopi cua organisacion lo kier tabata esun mas cerca di nan curason. A busca mas informacion di e otro studiantenan cu ta haci di e facultad trabaonan social, cu a duna un guia kico pa haci, cua fundacionnan ta esunnan cu ta sinti cu por ta mester di dje mas hopi y asina nan a yega na “Fundacion Respetami”.

 

Como un grupo, no tabata sa kico tur Fundacion Respetami ta haci y no tabata sa con cerca nan ta di scol tampoco. No tabata mucho di nan existencia y nan servicio na pueblo. A scoge Fundacion Respetami e ora. A sinta cu e fundacion pa wak kico nan metanan ta y kico por yuda nan cune.Tambe prome cu esaki tabata tin e pensamento caba di haci un bingo, pero e ora a haci’e un Blue Bingo, pa asina representa e Blue Ribbon cu ta wordo uza como concientisacion pa preveni abuso di mucha den tur su formanan.E ora el a bira un Blue Bingo. Pa e evento cu a tuma luga dia 20 di April na Club Caiquetio, el a bay hopi bon y Donker ta satisfecho cu e resultadonan di e bingo.

Un fundacion atractivo

Donker a splica cu ora a sinta cu nan, a haya sa cuanto informacion balioso cu nan tin. Tambe nan ta preveni. Nan ta cuminsa for di jong caba siña e muchanan cu ta OK pa bisa no. Tin cierto cosnan cu no mag di haci cu nan. Tin cierto cosnan cu hende no por bisabo pasobra e ta cay bao di abuso. Pero ta purba di siñanan na un manera cu nan ta compronde.
E ora, Donker ta contento cu nan tin e maneranan aki, pero tambe a wak cu si por yuda pa tambe haci e proceso aki di siña e muchanan riba esaki, por ta algo mas cu tecnologia cu tambe por incorpora esaki. Kier a busca maneranan con pa yuda y tambe nan mester di ayudo.
Tabata kier pa bisa e alumnonan di Universidad kico por yuda cun’e. Aki ta caminda a splica cu nan tin mester di un borchi pafo pa asina hendenan por wak miho unda Fundacion Respetami ta. Si pasa, no por wak’e asina facil. Donker ta spera cu e donacion por yuda nan.

Mice

Nan tabata un total di 6 grupo. Cada grupo mester a scoge un organisacion y a haci nan mesun evento. Tabata tin un evento riba Freewinds. Tabata tin dos scol y cada un tabata tin nan propio evento, manera un funday. Tabata tin un dogwalk tambe. Cada un tabata un evento riba su mes cu diferente tema y diferente organisacionnan caritativo. Cada un di e eventonan aki a desaroya riba su mes. Manera dogwalk tabata pa Animal Shelter cu diferente cacho e dia ey. E scolnan tabata tin nan mesun evento. Tur tabata diferente concepto y esey tabata hopi leuk pa wak tambe pa mira cada ken a bin cu su propio creatividad y a haci nan mesun evento posibel.

Un bunita donacion

Fundacion Respetami a haya un bunita donacion di parti di e alumnonan di Universidad di Aruba, facultad di hospitalidad y turismo, den forma di un borchi. Janiree van der Werf, preventiemedewerkster di Fundacion Respetami, a splica cu e tabata un sorpresa grandi pa nan, pasobra e meta tabata pa e studiantenan recauda 2500 y a end up ta recauda mas di 4000 florin pa e fundacion.
E meta ta pa pone un borchi dilanti, cual nan no tin actualmente. Nan a ripara cu ora nan haya bishita hopi biaha e personanan ta yama y bisa cu nan no ta haya e luga. E luga no ta duidelijk unda e fundacion ta. Kier a haci e ubicacion mas visibel y e ora lo ta mas accesibel tambe pa e comunidad yega pa asina haci pregunta.

Bista riba fundacion

Fundacion Respetami ta bay mas pa e parti social y Universidad ta bay mas riba e parti di mercadeo y turismo. Nan lo por nifica hopi pa e fundacion, pasobra nan ta wak e cos for di un otro bista. Por duna hopi tips y conseho riba e parti aki. Entre otro e borchi. Nan por yuda hopi cu e parti con pa haci’e mas visibel, mas atractivo tambe pa hende bisa cu e fundacion ta keda tal caminda y eynan por haya contestanan riba preguntanan riba abuso y negligencia di mucha.