E posicion di un security guard na aeropuerto di Aruba ta trece un responsabilidad grandi cu ne. Mas grandi cu un guardia cu ta traha cuida un negoshi den oranan di anochi, sin balota ningun trabou. Reputacion di aeropuerto di Aruba y Aruba mes ta den wega pa cualkier incumplimento di reglanan. Esaki tabata motibo cu Corte a duna Aruba Airport Authority rason ora cu a retira di forma inmediato un security cu a viola reglanan internacional.
Pio pasobra aki ta trata di Diego de Cuba, un sindicalista. Y mester señala cu no tabata un incidente den cual e tabata envolvi den dje y cu su añanan di labor, e mester tabata sa miho.
No mester lubida cu Triple A ta responsabel pa siguridad di aviacion civil. P’esey tin cierto areanan (cu no ni mag wordo menciona) cu mester controla e hendenan cu ta pasa eynan door di personal dedica na e tarea ey.
E security cu a comete e violacion di reglanan di trabou ta traha eynan desde 1999 y ganando un bon salario, mirando e responsabilidad cu e ta carga. E tabata co-responsabel pa screening y inspeccion di e edificio di aeropuerto y e puntonan di entrada pa e areanan protegi. E tabata responsabel di screen personanan y na ekipahe prome cu nan pasa e areanan specifico ey.
Na juni ultimo a mand’e cas, cu pago, mientras cu a cuminsa un investigacion pa echonan cu el a comete cu ta bay en contra di e reglanan di aeropuerto. Despues di 13 dia, a dicidi di dun’e su carta di retiro. E motibo tabata splica riba loke a pasa pero tambe incidentenan cu a tuma luga den pasado.
De Cuba, cu ta esun cu a bay Corte, a pidi pa sigui pag’e su salario te ora cu finalisa e relacion di trabou di un forma legal. Su abogado a bisa cu no tabatin un motibo urgente pa dun’e su retiro di inmediato. A bisa cu su doño di trabou no a tene cuenta cu su circunstancianan personal, esta cu e tin 63 aña caba y dificil pa e haya trabou otro caminda. E ta haya cu aeropuerto mester a dun’e un chens, door di impone un di e otro medidanan menciona den e Contracto Colectivo. Retiro di inmediato ta un medida mucho pisa y lo ta funesto p’e, segun de Cuba.
Den e caso aki cu ta un caso sumario, Hues a analisa si tabatin motibo urgente pa dun’e su retiro di inmediato.
E motibo di su retiro tabata cu den e periodo di 17 di mei te cu 20 di juni, 2023 diferente biaha y riba diferente dia, no a sigui e reglanan di screening. A constata riba camaranan cu dia 20 di juni, 2023 na checkpoint Zurich, dos biaha, a laga hende pasa sin e control cu ta exigi, of sin cu a screen nan.
Ora cu e trahado di empleado a bolbe di haci su trabou, e no a lage pone su cosnan den un baki pa pasa den e scanner di screening. A lag’e pasa a pesar cu e alarma a zona ora cu el pasa den e walk-through metal detector. Mester a sigui cu e control di diferente forma te ora cu e alarma no ta zona mas. Y un ora despues e mesun cos a tuma luga atrobe.
A sigui mira camaranan y a constata cu riba 17, 19 y 29 di mei y tambe riba 7 di juni, e mesun violacionnan a tuma luga. E ultimo biaha el a pega soño tras di e monitor cu ta controla e ekipahenan cu a caba di pasa den check-in.
Hues a bisa cu reglanan ta bisa cu mester controla tur hende y si alarma zona, mester saca tur cos for di saco di paña te ora cu no tin alarma mas.
Tin hende cu e no a controla, segun el a bisa, pasobra nan ta traha na e post ey, a pasa den control caba, a move solamente pa un par di minuut y e no a perde nan for di bista. Corte ta bisa cu e reglanan no ta dun’e espacio pa tuma un decision riba su mes si ta controla of no.
Corte no ta mira ningun motibo pa duna e trahado rason. Mas pasobra aeropuerto ta legalmente responsabel, local y internacionalmente, pa siguridad di aeropuerto y aviacion civil Y cu tur hende mester cumpli cu e reglanan.
E ponencia di e trahado cu nunca el a haya e reglanan por escrito, a wordo rechasa. Aeropuerto a bisa cu esey ta berdad pero cu pa motibonan di siguridad no por duna e empleadonan e reglanan aki riba papel. E ta online riba e sistema di sharepoint y tur empleado tin acceso na esaki.
Hues a bisa cu Triple A mester por tin security cu ta 100% confiabel.
A rechasa e peticion. Pues Diego de Cuba a keda sin trabou. E ta un di e personanan cu a mustra interes pa bira Mediador di Gobierno.
