Na Merca, den e studio di Tricky Stewart na Atlanta, USA, a tuma luga un firmamento historico entre e hoben Jeandrick v/d Biezen (Omar Pierce) y e pelotero Kenley Jansen cu su compania KJ74 Entertainment. E compania ta un ‘full service management/ publishing y entertainment company. Esunnan presente n’e momento importante aki tabata Chadwick Tromp y Efrem Mambi.
Kenley Jansen a indica cu su compania a firma cu su di dos artista. Desde aña pasa caba nan e keda cla cu e acuerdo sinembargo awe a tuma lugar e firmamento simbolico. Cosnan grandi ta bay pasa e aña ki. E acto di firmamento a tuma luga den studio di Tricky Stewart na Atlanta GA. Tricky ta un productor reconoci cu a gana 3 Grammy Award. El a produci hopi cantica famoso manera esun di Rihanna ‘Umbrella’ y ‘Single Ladies’ di Beyonce.
Jansen a expresa cu su label ta para pa habri caminda di e islanan Aruba, Boneiro y Corsou. Jansen su pensamento ta pa purba trece e islanan riba e mapa. E vision cu Jansen ta cana cu ne ta pa trece “nos mes riba mapa mundialmente.” E idea ta pa trece bon musica y dialuna tabata bon dia pa cuminsa. KJ74 Entertainment a firma e contract cu Jeandrick v/d Biezen.
Jeandrick v/d Biezen, conoci como Omar Pierce, ta gradici na Jansen pa kere den su persona y sin lubida su primo Chadwick Tromp. El a conta cu tur combersacion a cuminsa durante un breakfast na Aruba y asina a hinca tur cos den otro. El a expresa di tabata interesa pa manda Kenley Jansen tres demo. A manda e demo pa Jansen y awo a yega hunto. Segun v/d Biezen, e ta kere cu awo e trabou ta bay cuminsa.
Chadwick Tromp, kende ta catcher di Atlanta Braves, a expresa di ta orguyoso, contento y agradecido na henter team di Kenley. Tambe el a mira cu e team di Kenley tin hende amabel. E ta sigur cu Omar lo tin un team poderoso su tras y cu ta kere den dje. Ta importante pa bisa cu no solamente esaki ta un comienso, pero tambe un cambio den pensamento cu tin den e islanan chikito.
Hopi bes ta pensa cu mente cera y esey ta algo cu Tromp ta pasa aden na momento di bin Aruba. Esaki ta un bon comienso pa mustra pueblo di Aruba y Corsou cu si traha hunto cu e rumannan, nan lo yega leu. E oportunidad aki ta habri porta no solamente pa Omar y Kenley den e mundo di musica y baseball, pero den tur otro circunstancia cu por aparece.
