Dialuna atardi a tuma luga weg’i futbol riba den stadion na Dakota caminda Aruba a topa e ekipo di Boneiro. Ta trata di e seleccion di Damas di Aruba.
Ta den cuadro di e weganan cu ta tuma luga “na caminda” pa Gold Cup. Ta necesario pa gana punto pa por drenta den e competencia grandi aki. No ta mucho dia pasa cu Aruba a topa cu e ekipo di Boneiro riba nan isla. E partido ey no tabata fructifero pa Aruba. A bolbe topa cu e ekipo di Boneiro pero e biaha aki na cas mes. Un tremendo partido cu a termina 5-0 na fabor di e seleccion damas di Aruba.
Randolf Lacle ta presidente di Arubaanse Voetbal Bond (AVB), durante un entrevista cu 24ora.com el a conta cu ta despues di diesdos aña cu e seleccion nacional femenino ta hunga na cas. No obstante e orario y e dia den siman cu e wega a tuma luga, asina mes por a conta cu un publico basta grandi presente. Esaki ta un muestra cu futbol na Aruba ta riba nivel. Lacle ta spera cu, e resultado di awe por fungi como un muestra di motivacion pa mas hoben join un ekipo di futbol na Aruba.
Veron Albertsz ta head of coach di e seleccion, el a conta cu ningun wega ta mescos. Bo tin nobenta minuut pa presenta. E ta lamenta cu na Boneiro e resultado no tabata na nos fabor pero e biaha aki na cas e suerte tabata t’ey y por a nota tambe cu e muchanan a hunga hopi mas miho. E golnan a cay trempan cual a duna oportunidad pa avansa y den e di dos parti tabata mas fuerte den atake.
