Nos ta na caminda pa Festival di Tumba 2024, den su di cincuentidos edicion. E aña aki e festival lo tuma luga den Balashi Beer Garden.
Nos colega, Edward del Orbe, di e departamento di entretenimento a combersa c’un gran tumbero, den e caso aki Jose Hubert Anthony Dania, miho conoci como Ito Dania. Ito na tres ocasion a sa di gana e titulo maximo di Rey di Tumba.
Ito ta conta di e temponan grandi di tumba unda cu e competencia tabata pisa y na final di anochi, ainda hopi hende tabata duda di ken lo sali Rey di Tumba. El a yega di competi cu Juancho Kock, Chicho Kock, Didi Wernet, Tattoo Quant. Es decir, e grandinan den tumba.
“Mi ta sigur cu si mi subi y canta cu e tumberonan di awendia, ainda mi ta un competencia fuerte,” Ito a bisa.
TUMBA DI ARUBA
Ito a comenta cu Aruba su tumba ta den top. Tres isla cu ta toca tumba, pero cada isla cu nan mesun estilo. Corsou su tumba ta mas lihe cu di Aruba.
E gran maestronan di tumba, Martin Quandus, Casin Giel tabata esunnan cu a composita p’e. Tambe Chicho Kock cu t’esun cu a composita e ultimo tumba p’e.
Un tumba bo mester sintie y bib’e pa bo por cant’e! Articulacion ta masha importante, pa nan sa kico bo ta cantando.
Ito ta reconoce cu e tabatin bon tumba y cu ainda, si e tin un tumba, ainda e ta competencia. Pero, e sa tambe, unda pa bisa “ta basta!”.
Como ultimo, el a manda un mensahe pa SMAC y Stichting Musica, pa nan uni cu otro pa bienestar di Aruba su Carnaval. Sin union, ta perde su Aruba su Carnaval tin di perde!
