E aña aki, Daylan Krozendijk y Ferdinand Franca, dos profesional riba e area di teatro, conhuntamente cu Jeugdtheaterschool Drazans di Curaçao, lo ofrece nos hobennan amante di teatro, un biaha mas e oportunidad di engrandece nan conocemento teatral como tambe yuda nan den nan proceso artistico y profesional.
Esaki lo cuminsa diadomingo, prome di october y lo termina dia 6 di october cu un tremendo presentacion teatral. E programa lo tuma luga na Centro Hubenil Washington na Noord. E proyecto yama: 25 Hours of Theatre, cual ta encera cu nos hobennan entre edad di 13 pa 18 aña, lo haya 25 ora pa traha riba un presentacion di teatro. Lo presenta esaki despues riba diabierna dia 6 di october cuminsando pa 7’or di anochi.
E hobennan lo haya guia profesional di coaches (maestronan y directornan di Teatro), tanto nacional, regional y internacional. Lo reparti e participantenan hoben den grupo y lo haya un tarea specifico pa traha cu ne.
E intencion ta pa duna e hobennan e oportunidad di bin cu nan mesun creacion, prepara un obra for di cero, traha cu otro hobennan y siña habilidadnan di bida manera comunicacion, creatividad y hopi mas.
Na final lo haci un presentacion teatral na publico en general. Daylan y Ferdinand, kier a invita tur e hobennan cu ta den e mundo di Teatro of kier siña mas di dje, pa no perde e gran oportunidad aki.
Cu e proyecto aki ta desea di prepara e hobennan den nan formacion teatral y asina por continua cu e bunita disciplina di Arte.
Debi na e exito grandi di aña pasa cu e 20 Hours of Theatre, e docentenan di teatro kier sigui cu proyecto y programanan asina, pa engrandece Teatro na Aruba. Nan enfoke ta hobennan cu mester sigui mantene e disciplina di Teatro bibo pa e siguiente generacion. Nan lo ta nos futuro lidernan cu mester continua cu e bunita forma di Arte aki.
Prins Bernard Cultuur Fonds Caribisch Gebied y Unoca ta e dos organisacionnan cu ta brinda apoyo na e proyecto. Tambe un danki ta bay na Jeugdtheaterschool Drazans pa e colaboracion y guia pa por realisa e proyecto.
Por yama of Whatsapp na 5630298 of 7309696 pa mas informacion y/of inscripcion. Por manda un mail tambe na [email protected]. Tambe por sigui e pagina di Facebook ‘25 Hours of Theatre’.
Debi cu e ta un proyecto pa hoben, a pone un prijs special pa asina tin mas asistencia di nos hobennan.
Hoben, no perde e tayer unico aki y e oportunidad di profesionalisa bo mes y siña mas di disciplina di Teatro!
