Cu orguyo Tropical Bottling Company como emboteyado autorisa pa produccion y distribucion di e productonan di The Coca Cola Company ta informa cu AWA ta conoce un transicion y e nomber lo bira awo “Dasani by Awa”. Jessica de Veer, Marketing Coordinador di Coca-Cola na Tropical Bottling Company, a indica cu Dasani t’un producto cu ta pertenece na The Coca Cola Company y ta mundialmente reconoci. Awo e producto lo cuminsa cu su trayecto aki na Aruba.
Dasani a uni cu Awa
The Coca Cola Company ta reconoce cu e calidad di e awa di Aruba ta superior, pues e compania a demostra interes pa mira con Dasani por uni cu Awa haciendo uzo di e nomber Dasani mientras ta mantene e calidad cu Tropical Bottling y e awa di Aruba ta ofrece. E proceso di produccion tabata y lo continua mescos!
Mesun proceso di produccion, e mesun awa
Jessica de Veer a sigui splica cu e proceso ta inicia ora cu “Dasani by Awa” ta yega e planta di Tropical Bottling Company for di W.EB. caminda ta cuminsa cu e proceso di tratamento. E prome proceso di tratamento ta ricibie, e siguiente paso ta pas’e door di e sand filter y despues ta pas’e bou UV light. Resultado di esaki ta un awa transparente sin ningun particula, nada di bacteria, ni mucho menos holo. Asina cu caba cu e pasonan ey, e awa ta cla pa bay den e boternan di 12oz, 20oz of 1 liter.
“Mi ta invita pueblo di Aruba pa bebe Dasani by Awa”, asina Jessica de Veer a comenta. El a finalisa bisando cu door di purba e Dasai by Awa, e cliente por ta sigur cu ta e mesun awa pero cu un otro nomber.
Tocante Tropical Bottling Company
Tropical Bottling Company, un subsidiario di MetaCorp, e empresa mas bieu di Aruba, a nace na aña 1948 den Wilhelminastraat, banda di unda awe ta El Gaucho Restaurant. E tempo ey e planta tabatin un capacidad pa yena 10 boter di refresco pa minuut. Awendia, e planta ta situa na Balashi y ta conta riba un capacidad pa yega 600 boter of bleki pa minuut. Awendia, separa di Coca Cola, e planta ta produci un cantidad di producto, di nan mesun liña Tropical y otronan. Den añanan 90 a lansa Awa, cu a bira asina exitoso, te cu The Coca Cola Company mes a opta pa tum’e over…un desaroyo cu Aruba por ta orguyoso di dje!
