E pueblo di San Nicolas ta sinti nan mes honra cu bishita di Famia Real. Riba e prome dia di Famia Real riba nos isla nan a bishita San Nicolas parti atardi. A bishita Filomena College caminda tabatin un presentacion bunita relaciona cu e historia di Boy Ecury. Na banda di esey a sigui pa un recorido den e cayanan di San Nicolas. S.A.R. tabata hari masha hopi durante e presentacion dilanti Nicolaas Store, ta nota cu tanto Rey como Prinses tabata disfruta di e show.
A combersa cu diferente figura pa puntra nan riba nan sentimento pa cu e bishita real. A combersa cu entre otro, Anuesca Baly, Harold Farro, Franklin Priam, Marlon Briezen y mucho mas. Tur tabata contento cu e bishita. Tin cu hasta a pidi dia liber pa bin mira Famia Real di cerca. Un di nan a comenta cu ni na Hulanda nan ta haya chens di mira nan di cerca asina, pues tabata bale la pena pa pidi un dia liber pa mira nan.
Otro ta pidi nan pa ayudo pa San Nicolas, mientras cu mayoria tabata sinti nan honra cu e bishita, vooral na e scol. Ta prome biaha cu Prinses Amalia ta bishita nos isla, pa cual pa algun tabata importante pa bin wak nan, mirando cu no ta conoci ki dia nan ta bolbe. Ultimo biaha cu nan tabata riba nos isla tabata na aña 2015.
