E aña aki Elite Productions lo sostene entre otro dos trailer y otro dos banda cu zonido e aña aki. E zonido su intencion ta pa bira mescos cu aña pasa su setup. “Mi idea ta p’e bay duro pa no ‘mata hende’ pero duro suficiente cu tur hende por disfruta,” segun Ashwin Werleman di Elite Productions. Aña pasa a bay sublime segun Werleman, super bon organisa y tur cos a bay trankilo. E sistema no a yega ainda su potencial di 100%, tin hopi caminda ainda pa bay segun Werleman y e aña aki toch lo ta premira di bay manera aña pasa. Aworaki tin tres dia den preparacion pa e parada di Flambeu.
“Nos kier pa tur hende disfruta sanamente, ban cuida otro, y e parti mas principal ta si bo ta bebe no stuur of busca un otro hende yuda bo yega bo cas. Mirando tanto accidente pasando e dianan ki, please si bo t’ey bebe busca bo amigo didi of otro colega,” segun Eric Clement di Elite Productions.
Ofo Escudero,Manager di ‘NFuzion ta bisa cu emocion ta basta halto sigur ayera nochi durante preparacionnan p’e parada di diasabra pa inicia carnaval 70 den grandi. High Performance ta un otro compania cu ta percura pa zonido den carnaval y nan semper ta bon prepara for di trempan segun Escudero ta conta, tratando di pone tur ekipo na otro pa haci nan trabao manera mester ta. High Performance ta bay tin un di e miho zonido riba caminda e aña aki segun Escudero. Tur dos trailer ta cla, cual ta esun di Robert y su Solo Banda Show, trailer di N’Fuzion tambe ta cla y asina tambe diasabra pa fakkel tur dos por sali bon representa. High Performance lo tin mas trailer p’e otro paradanan manera Shine Music cu lo bay cu T. O.B.
“E prome parada semper ta esun di mas stop cu tin, pero di e momento eynan tin cosnan cu por pasa, nos ta spera y bati riba palo cu nada bay robes, mescos nos ta pidi pa tur nos otro coleganan, cu trailer duna nan maximo. Loke ta N’Fuzion, lo bini manera semper cu repertorio grandisimo, semper nos tin un sistema di keda varia. Leu a leu nos ta ripiti un of otro cantica cu nos ta wak hende ta biba cu ne pero normal tin un minimo di 45 cancion cu lo bay zona mayan caba,” segun Escudero ta conta.
