E spirito santo ta bisa claramente cu den e ultimo temponan algun lo cay for di fe, door di pone atencion n’e spiritonan engañoso y doctrinanan di demonionan.
Pa medio di hipocresia di gañadonan kende nan mes consenshi a kima, comosifuera ta cu hero cayente a haci esaki. ( 1 Timoteo 4;1- 2)
Sa cu den e ultimo dianan temponan trabahoso lo bini. ( 2 Timoteo 3:1-5). Y esaki ta e tempo cu nos tur ta mira con e situacion mundial ta cambia, y con peligroso e tempo ta birando, y asina nos opcion ta pa eleva nos oracion na Dios, pasobra Dios ta nos unico refugio y nos speransa,nos pronto auxilio den tur situacion.
Tur locual cu nos ta mira,y nos ta tende, laga e sirbi como un advertencia pa hala mas cerca Dios, pasobra e plan di e enemigo ta pa hende hala bek den scuridad y asina cay den decepcion. Nos tur por nota e mal influencia di violencia cu tin riba nos hubentud, e gara di maldad y iresposabilidad, e malcriansa cu ta produci mucha baldadi, y cu ta demostra cu si no bini un coreccion na tempo, nos lo cosecha hoben criminal.
E caida di decensia y temor di Dios ta pone nos bin bij, cu no ta wega ta tumando lugar, pero di berdad maldad kier domina den tur area. For di un principio nos tur sa cu manera bijbel ta bisa, cu e ladron a bini pa horta, mata y destrui, pero hopi ta pensa cu nan por cana den caminda di maldad y keda sin trompeca.
Dios ta fiel, y husto, e ta stima e ser humano, pero e no ta stima e pica, pasobra pica ta separa nos for di Dios. Dios ta duna oportunidad y su palabra ta bisa cu Dios ta luz y den dj’E no tin nada, nada di scuridad, y su palabra ta bolbe recorda nos, cu si nos confesa nos pica E ta fiel y husto di pordona nos,nos pica y libra nos di tur inhusticia.( 1 Juan 1;9).
Ta nos deber di presenta e evangelio di Dios na cada miembro di nos famia, pa demostra na nan cu nos bida, cu nos testimonio, cu Cristo Hesus ta goberna den nos bida, nos coleganan di trabao mester sa cu Cristo Hesus ta bibo y real den nos bida y a bini pa keda. Ta tempo pa busca Dios den ayuno y oracion, ta tempo pa intercede pa nos sernan keri, sea nan ta den Señor of nan no a tuma e paso ainda pa ricibi nan salbacion den Cristo Hesus, pa Dios tene misericordia y libra nan di maldad.
Ta tempo pa aleha for di tur idolatria, tur adoracion falso, tur doctrina falso y enseñansa diabolico, y asina evita decepcion na yegada di Cristo Hesus, cu den un momento of otro por presenta. Hende mester keda fiel na Dios, y abstene di tur forma di maldad, palabra di Dios ta bisa cu Señor conoce tur esnan cu ta di dje, laga nos permanece den su presencia, pa nos tin forsa contra e atakenan di e enemigo. Pasobra nos no por ignora su engañonan.
Hendenan malbado y gañado lo bay di malo pa peor, ta gaña y siendo engaña.( 1 Timoteo 3:13).
Pero nos no ta di esnan cu ta bay atras pa destruccion, sino di esnan cu tin fe pa preservacion di e alma. Awor ta e tempo pa nos lanta oracion den nos hogar, pasobra e presencia di Dios, ta necesario den tur bida.
Sinceramente,
Pastor Marcel Balootje.
