Tur cos ta indica cu e diferencia di opinion entre sindicato di hospital ABV y gerencia di hospital ta basta grandi cu no por yega na un comprondemento den un reunion di un ora. Despues di a sinta mas cu un ora na mesa, den presencia di Abogadonan, e sindicato ABV a anuncia cu e reunion lo sigui pa 1’or di merdia.
E reunion aki a cuminsa prome cu 11’or di mainta, y algo prome cu 12’or di merdia a schors e intermediacion, bou guia di Mediador, pa sigui te cu 1’or di merdia. Gerencia a pidi e sindicato pa e miembronan di ABV reanuda trabou mientras cu nan ta sinta na mesa y trata di yega na un acuerdo.
Gina Maduro, presidente di ABV, a papia cu e miembronan y a bay di acuerdo pa reanuda trabou. Pero a laga bon cla cu no ta bay entrega nada mas, ni 5% mas, loke cu nan a bin ta haci e ultimo lunanan. Mas pasobra nan ta trahando oranan extra.
No tin ora pa e reunion finalisa pa cual Maduro a bisa e miembronan cu si e reunion sigui te laat, diamars mainta 6’or e lo topa cu e miembronan pa duna un relato di e reunion. E mensahe cu a hiba den e reunion ta “nos no ta entrega mas”.
