Dialuna a habri cu e noticia di medidanan cu Minister di Husticia Andin Bikker a tuma pa reforsa siguridad na KIA. Por a mira cu awo rapidamente KIA su instalacion tabata rondona di iluminacion, cu auto di Polis y team di siguridad coriendo 24/7 rond di KIA.
Di otro banda, den e toren a pone personal di un compania di sector priva pa tene e vigilancia. Algo cu no a cay na agrado di sindicato TOPA cu ta representa un grupo grandi di trahadonan di KIA. Tin un preocupacion grandi bou di e trahadonan for di momento cu e personal di e compania a cana kibra mainta tempran, sin cu nan a pasa den ningun screening. Pa colmo entre nan tin persona cu su bishita preso y awo ta pone pa tene vigilancia den e toren di control.
Rene Bernabela, presidente di sindicato TOPA, a bisa cu asina cu e informacion aki a drenta, a tuma contacto cu Minister di Husticia Andin Bikker. “Mi tin cu confirma cu e noticia cu a sali riba 24ora.com ta caudra cu realidad.” E mandatario a splica Bernabela cu esaki ta un medida di emergencia, uzando trahando di e compania Safecom pa traha for di diasabra madruga te cu manece diadomingo, pa reforsa Cuerpo Especial Arubano den e schiettoren. E decision aki tabata valido pa e fin di siman aki so y na ta re-evaluando e situacion.
E uzo di personanan di sector priva ta algo cu e sindicalista a pone na atencion di e mandatario tambe. A inform’e cu tin comprension pa e medida di siguridad di emergencia cu el a tuma, pero mester ta mas atento riba tipo di situacionnan asina. Ya cu e personanan cu a traha hunto cu personal di CEA, no tin ningun preparacion special dado caso cu surgi un emergencia. Den un instituto asina peligroso manera KIA security guardnan ta wordo poni pa traha hunto cu personal di CEA. “Mi a bis Minister si cu pa proximo biaha mi ta spera nan ta miho prepara y haci un re-evaluacion prome cu yega na uza personal di Safecom pa traha cu personal di CEA.”
Tambe e mandatario a splica cu si nan ta evaluando pa reforsa e parti di siguridad pafo di KIA, lo aserca e Cuerpo di Marina pa duna un man. Pero el a enfatisa cu no tin un decision ainda riba e parti aki. Mesora, segun Bernabela, el a bisa e mandatario cu e problema no ta e medida di emergencia cu por tuma na cualkier momento sino e problema di mas grandi ta e “onderbezetting”, e cantidad di hendenan cu ta malo y TOPA tabata kier sa kico ta wordo haci recluta personal nobo.
CFT ta bisa cu no por tuma personal nobo, pero di otro banda mester mira cu tin un situacion alarmante na e momentonan aki den departamentonan cu ta cay bou di husticia, y cual ta e falta di personal. Si gobierno no por haya personal nobo, TOPA kier sa con ta bay contra-aresta e problemanan ariba menciona.
E motibo di ziekte-melding na e departamentonan di husticia ta cu nunca a haci un investigacion di e cantidad di personal necesario pa e diferente departamento, pa evita e “onderbezetting” cu tin na e seccionnan di husticia. Na mesun momento e mandatario a informa e lider sindicato, cu el a duna ordo na Departamento di Recurso Humano pa saca un circulario publico buscando hende interesa pa traha na KIA. E preocupacion di TOPA ta cu e “onderbezetting” no ta KIA so pero tin e mesun situacion na Inmigracion, Cuerpo Especial Arubano y Cuerpo Policial tambe. Tur e cadena di husticia, pa añas, tin e problema di escasez di problema. Hopi biaha a draai rond y a bay riba otro tema pero finalmente e problema mes ta e falta di personal. Ora cu funcionarionan bira malo of hende bay cu vakantie, e presion riba e trahadonan cu ta keda ta bira mas grandi, unda cu tin biaha ta traha shiftnan di te hasta 18 ora. A yega te na e limite, cu e trahadonan a expresa cu nan no ta interesa pa traha “overtime’ mas pasobra e tin demasiado negativo riba nan funcionamento y ta bira malo.
Construccion di un prizon tampoco ta soluciona tur cos, pasobra sin e personal adecuado nan no por bay funciona bon tampoco. “E dos cosnan aki ta bay man den man cu otro. P’esey bo no por laga ken cu ta drenta prizon pa haci un trabou cu nan no ta prepara pa esaki.”
TOPA ta na altura di tur e preocupacion di e trahadonan di KIA, pa loke ta arma y hermentnan necesario. E mandatario a informa TOPA cu e ta bayendo Parlamento pidiendo mas placa pa por cumpra material necesario pa personal di KIA, pa por haci nan trabou debidamente. KIA semper mester ta un prioridad cu personal y material necesario. E uzo di personal externo mester ta miho supervisa y prepara.TOPA tambe a tende cu diasabra anochi tabatin un razzia teni den KIA unda cu a confisca diferente material ilegal, y hasta droga a wordo haya.
