Diamars den oranan di mainta a cuminsa oficialmente cu e trabou di rosamento di tereno na Seroe Colorado, unda ta bay construi un hotel cu ta wordo hopi cuestiona den comunidad.
E grupo Three Rivers, cu ta e desaroyado, a logra demostra na Banco Central y Gobierno cu e suma di deposito ta haya di forma legal.
Na momento cu reporteronan di 24ora.com tabata na e sitio, tabatin un chubato ta rosando un parti grandi di naturalesa na Seroe Colorado.
Loke ta wordo cuestiona den e proyecto aki ta e tereno grandi cu a keda otorga na e desaroyadonan, cu ta 6 pa 7 biaha mas grandi cu e tereno cu e hotel lo mester. Hopi ta kere cu e hotel lo por tin cosnan positivo pa San Nicolas, pero atrobe e grandura di e tereno ta loke cu a hala atencion di hopi hende.
E trabounan aki no ta pa inicio di construccion di e hotel, sino cu mester haci algun boramento den e area pa mira e calidad di e suelo y ki tipo di material of ki tipo di fundeshi mester bini cun’e pa e hotel.
Na momento di e rosamento, cu a cuminsa for di 7’or di mainta, no a mira ningun defensor di medio ambiente cu normalmente tabata critico, manera tempo di racetrack. Na momento di e rosamento, por a mira hopi parha ta bula bay tambe.
Informacion cu 24ora.com a scucha ta cu Minister di Infrastructura ta haciendo invitacion pa un biahe pa Republica Dominicana pa mira e hotelnan cu e grupo tin na e pais ey.