Awe tardi pa 6:30pm, Prome Minister mr. Evelyn Wever-Croes a pidi pa miembro di Parlamento pa Fraccion di AVP, mr. drs. Richard Arends mester tuma su retiro pasobra e ta riba payroll di Refineria di Aruba (RdA) como Chief Financial Officer y si kier kit’e lo mester pag’e 2.6 miyon florin. Claro cu un semehante publicacion di e maximo mandatario di nos pais, cu acceso na tur informacion den RdA, ta causa hopi sensacion. E unico cos ta cu Wever a scoge pa deliberadamente gaña riba su opositor politico, e mesun cu e ta yama frecuentemente pa tur sorto di informacion di RdA!
E publicacion claro a conta cu sosten mesora di e demas Parlamentarionan di MEP, cu enbes dedica atencion na apertura di Avenida Nelson Oduber, a opta pa start un guera di purba atacha nomber y imagen di Richard Arends.
No a dura mucho cu mesora a bin reaccion di e miembro di Parlamento, cu a keda hopi asombra cu net Evelyn Wever ta sali atak’e asina. Ta obvio cu aki curashi a yega su maximo. E mesun mandatario cu ta permiti pa e bufete cu e ta(bata) doño di dje, Croes-Wever-Ruiz ta defende su Ministerio y casi tur compania di utilidad di Gobierno cu ta cay directamente bou di dje, e mesun Wever cu tin su tata sinta den reunionnan di RdA como consehero huridico, e mesun cu a hinca su mesun Primo, condena pa malversacion/falsificacion di Paspoort di Hulanda, awe ta hinca den RdA….e mes ta purba lansa un atake frontal contra Arends.
Den e contesta di ex Minister di Asuntonan Economico di Gabinete Mike Eman II, el a splica cu berdad na october 2016 el a acepta un trabou na RdA, pero algun dia despues, Otmar Oduber a tuma retiro di Gobierno y a aserca Arends pa e bira Minister. Consecuentemente e nunca a tuma e funcion, nunca a traha na RdA y nunca a cobra tampoco…..y Arends ta sigur cu Wever sa esey masha bon!
Ta e mesun Evelyn Wever a laga investiga RdA, a kita laptop di Alvin Koolman, coba den computer di tur hende, check tur files, buscando cualkier iregularidad den RdA sin por haya nada te awe! Pues e sa cu nunca el a cobra, per toch den su afan pa purba mancha nomber di Richard Arends, net na vispera prome cu e haya su KB di Hulanda aki dos siman, a core lansa e publicacion. Pero no a dura mucho cu su so a cuminsa haci “damage control” pa su mesun publicacion of pa esun cu a publik’e den su nomber.
A tuma nota cu Richard Arends a opta pa contesta Evelyn Wever personalmente y no a contesta e Parlamentarionan. Probablemente el a realisa cu su 1390 votonan ta MAS cu TUR e Parlamentarionan di MEP sinta den Parlamento, pues no ta bale la pena atende cu politiconan cu votonan limita. El a opta tambe pa no duna comentario ainda, sino te mayan den conferencia di prensa. Na celular el a bisa nos si “Mi ta spera Evelyn no ta confundi ami cune”, teniendo cuenta cu Wever y/of su famia directo ta gozando na grandi den RdA ainda, prome cu Hulanda kita e poder financiero for di e Gabinete aki!
