Diahuebs atardi a tuma luga un charla organisa pa Organisacion Parkinson Aruba den e edificio nobo di MFA na Santa Cruz. Un publico grandi a atende, hopi mas cu e organisacion mes a anticipa y a prepara pe, demostrando cu tin un hamber pa informacion riba e tema y enfermedad aki. Orador principal tabata Neurologo, Dr. Roberto Weiser, cu ta traha na Dr. Horacio E. Oduber Hospitaal. E specialista a keda masha contento di por a topa cu un cantidad di pashent, famia di pashent y ciudadanonan cu djis ta interesa den conoce e enfermedad mas di cerca.
Dr. Weiser a conta cu durante e charla a comparti informacion actualisa riba e enfermedad Parkinson, dicon hende por haya e enfermedad aki, sintomanan, e tratamento cu pilder, cu operacion, etc. A surgi hopi pregunta for di sala y a sinti cu e publico tabata hopi interesa cu motivacion pa traha pa e organisacion tambe.
Un di e preguntanan cardinal durante e charla tabata su Parkinson ta un enfermedad hereditario, pues cu si un yiu por ehempel por hereda e enfermedad di su mayornan. E specialista a contesta si y no. El a aclaria cu pa hereda un enfermedad Bo mester un “gene”. Den algun pashent sa topa cu e “gene” aki, conoci como “Parkin 1”, “Parkin 2” y asina mas, pasobra tin diferente sorto di e “gene” nan aki. Pero cerca otro pashentnan no ta topa ningun “gene”, pues pa bisa cu si e ta hereditario mester haya e “gene”.
Den practica, ta kere cu 10 pa 15 porciento so di e enfermedad aki ta hereditario. E demas di 80 pa 90 porciento no tin un famia directo cu Parkinson, pues e ora no por bisa cu e ta hereditario si no tin mas famia cu e enfermedad aki. Pesey e ta bisa cu tin biaha si y tin biaha no.
Cura pa Parkinson no tin, pero por preveni dor di biba saludabel, haci ehercicio, movecion, come saludabel, etc. Asina mes e specialista a admiti cu hasta si cumpli cu tur esey, ainda no por garantisa cu lo evita di haya e enfermedad aki. Lamentablemente ciencia no a yega na un cura ainda. Di otro banda, e unico forma cu por papia di un “trigger” pa e enfermedad aki, ta ora cu topa un “gene” cerca un pashent. Si no tin e “gene”, e ta keda un asunto dificil, pasobra no ta existi un remedi cu por evita un pashent pa haya Parkinson.
Dr. Roberto Weiser a bisa cu e ta kere cu na Aruba lo tin mas o menos 200 pashent. Pasobra normalmente ta uza como standard cu tin 100 pa 20 pashent pa cada 100 mil habitante. Como cu na Aruba nos tin 120 mil habitante, pesey ta pensa cu e cantidad ey nos tin na Aruba. Ta bon pa bisa cu e edad pa cuminsa nota sintomanan di Parkinson ta basta halto, generalmente entre 55 pa 65 aña di edad.
Pa tur esunnan cu ta desea di haya mas informacion di Parkinson, por tuma contacto libremente cu e Organisacion di Parkinson di Aruba (OPA).
