Awe Gobierno di Aruba (Minister mr. Xiomara Ruiz-Maduro) por medio di bufete di abogado David Kock, a entama un caso sumario contra Sindicato di Aduaneronan di Aruba (SADA) relaciona cu e opcion di posibel accionnan cu lo por afecta e funcionamento di Departamento di Aduana di Aruba. Corte a fiha un fecha dialuna awo pa trata e caso (kortgeding) aki. Pero, abogado pa Gobierno a pidi Hues awe un “ordemaatregel” pa prohibi e reunion di awe y cualkier otro reunion of accion bou ora di trabou te cu dialuna ora e caso tuma luga. Hues a aproba e peticion aki tambe.
Den e peticion pa “ordemaatregel” a pidi e Magistrado pa prohibi tur tipo di accionnan, welga, of reunionnan colectivo bou ora di trabou, relaciona cu e decision di Director di Departamento di Aduana, Ricky Croes, cu a traha un rapport contra Edward Maduro, Presidente di SADA, den su calidad di Duanero. Tambe a pidi Hues pa impone un “dwangsom” di 250 mil florin pa cada dia of parti di dia cu nan no cumpli cu e ordo aki. Riba dje, lo cobra e sindicato tur e gastonan cu a recori pa a haya e decision aki di Hues.
Loading...
Reload document 
Open in new tab Presidente di SADA a bisa un rato despues den un entrevista cu e no ta comprende e posicion di Gobierno. Mainta a pidi nan pa reuni cu Mediador di Gobierno, locual SADA a cumpli cune pa por mira si por yega na otro. Ta parce cu a yama e reunion aki pa cumpra tempo y tene e sindicato ocupa, pasobra aunke cu Anselmo Pontilius como Mediador di Gobierno a conseha nan pa reuni cu e trahadonan y splica nan cu lo duna tempo pa por papia cu otro y yega na un solucion, cu ta yega Deurwaarder na porta di SADA cu un peticion pa caso sumario dialuna awo y na mes momento un prohibicion pa tene reunion of accion bou ora di trabou. SADA no a aprecia e forma aki di procede di Gobierno den e caso aki, pero ta respeta decision di Hues.
