Recientemente The Cinema a invita medionan di comunicacion pa cera conoci cu nan seccion nobo, dos sala comberti den un berdadero VIP Room, esta salanan 1 y 6. Eddie de Veer, CEO di MetaCorp, cu masha orguyo y satisfaccion a anuncia cu awo pueblo di Aruba por disfruta di peliculanan pero den un sala hopi mas comodo, combina cu servicionan adicional.
E salanan VIP ta encera stoelnan comodo cu ta “recline”, mesa cu ta hala dilanti, combina cu un menu special di productonan sirbi te na bo stoel. E salanan VIP tin luga pa solamente 50 persona.
Devin de Veer, Sales & Marketing Coordinator di The Cinema, a anuncia servicionan nobo. Cu un push na e boton na bo stoel, un waiter ta bini cerca Bo, ta tuma Bo pedido den sala y por paga den sala mes. Pues clientenan den e salanan VIP no mester sali pa para den rij. E trato aki ta completamente diferente cu e “comfort class” cu The Cinema ta conoci pe.
Pa por a termina cu e salanan a dura 2 pa 3 siman, trahando dia aden y dia afo pa por a keda cla cun’e prome cu aña termina. The Cinema ta hopi orguyoso di mira e resultado di tur cos.
Un otro cambio cu tin den e salanan ta un sistema di zonido superior, mientras cu e pantaya ta hopi mas skerpi. Pues no a upgrade solamente e stoelnan, pero tambe zonido y pantaya. Pa cumpra ticket pa haci uzo di e salanan VIP na The Cinema, por bishita e booth dedica y asina evita para den fila.
