Como municipio special di Hulanda, Saba ta sinti hopi miho compara tempo cu e tabata un isa insular den Antias Hulandes. Durante celebracion di e di 43 “Dia di Saba”, e desaroyo positivo cu a tuma luga riba e isla, a incluy’e como un organismo publico den e Gobierno Hulandes.
Diputado Bruce Zagers, a mustra den su discurso na e invitadonan riba e periodo prome cu 2010: “Na e momento ey, un presupuesto tabata un realidad riba un lista di deseo y tabata un lucha tur dia pa haya formanan creativo pa haci cu e Gobierno y e servicionan basico funciona. Lucha pa paga debe, salario, evacuacionnan medico, percura pa botica di hospital ta yen y pa docentenan y scolnan ta ekipa cu e hermentnan pa educa nos yiunan.”
Tur e problemanan aki ta tra’i lomba, segun Zagers, kende a señala cu a progresa den practicamente tur e sectornan di sociedad, no solamente den Gobierno, sino tambe den organisacionnan no-gubernamental y den comunidad.
Danki na e bon maneho financiero di e isla mes y e financiamento di e proyecto di gobierno central, Saba ta experenciando un transformacion positivo.
“For di un pista nobo di aterisahe y un terminal renoba, te na un hospital completamente renoba, edificionan escolar nobo y klasnan renoba, speeltuin den nos districtonan pa e expansion di e waf cu lo cuminsa otro aña, ta avansando den tur parti den e areanan di vital importancia pa nos ciudadanonan y pa crecemento di nos isla.
“No tur cos ta perfecto ainda; sigur tin espacio pa mehoracion,” e Diputado a enfatisa, argumentando e necesidad di drecha costo di bida y combati pobresa. Den e zonanan aki, ta spera mas di e gobierno Hulandes.
Ta papia riba esaki e siman cu ta bin ora cu Zagers y su colega Rolando Wilson realisa un bishita di trabao na Den Haag.
