November ultimo TeamCITGO Aruba a participa den e beach cleanup anual di Aruba Hotel and Tourism Association (AHATA) den e area di baby Beach te cu Santana di Cacho na San Nicolas. E evento tabata e prome evento voluntario pa e organisacion voluntario nobo y 95 voluntario di TeamCITGO a yena aproximadamente 175 saco di sushi cu sushi di nos costanan. E saconan a wordo hiba pa e punto central di colección na Seroe Colorado pa wordo procesa. Raymond Buckley, VP&GM Interino di CITGO Aruba Refinery a bisa cu TeamCITGO Aruba tey pa keda. “Ta e misión di TeamCITGO pa forma parti di nos comunidad por medio di voluntarismo. Nos lo dedica nos tempo y servicio na causanan y organisacionnan importante aki ariba nos isla”, ela bisa. E voluntarionan di TeamCITGO ta consisti di empleadonan di e refinería, contratista y nan famia. E organisacion tin planea pa keda participa den trabou voluntario na beneficio di nos comunidad incluyendo e limpiesa di e islanan di bubi na comienzo di luna di januari. Tocante CITGO Aruba CITGO Aruba Refining N.V. (CAR) ta un compañia Arubiano cu ta forma parti di un grupo di compañia operando bou di PDV Holding Inc., doño indirecto di CITGO Petroleum Corporation y subsidiario di Petróleos de Venezuela, S.A., e compañia nacional di petroleo di e República Bolivariana di Venezuela. CAR ta e operador di e refineria di Aruba, situa na San Nicolas, Aruba cu ta propiedad di Refineria di Aruba N.V. (RdA), un entidad di cual Gobierno di Aruba ta propietario absoluto.
