Dialuna atardi e taekwondistanan di Team Taekwondo Aruba a regresa for di Costa Rica, unda nan a competi. Durante e competencia na Costa Rica, nan a sa di haci un bon papel y a termina ta gana dies medaya.
Melvin Garcia, relacionista publico di Taekwondo Team Aruba, a splica di ta sumamente satisfecho cu e team aki cu ta mas grandi pa participa den e G2 President’s Cup na Costa Rica. Nan a gana dies medaya, di cual cinco di nan ta di oro. Un di e medayanan tabata den e disciplina di poonse, di cual pa prome bes Team Aruba a participa. E hoben Arya Genser a logra gana e di tres luga.
E delegacion tabata un siman na Costa Rica, di cual e torneo aki ta conoce la crème de la crème den taekwondo. Tur e paisnan Centro Americano, Sur Americano y un par di nan di Caribe a participa. E competencia tabata bastante pisa, pero e muchanan di Aruba a mustra pakico nan ta train asina fuerte. Nan tabata asina bon disciplina ora nan tabata riba e mat di bringa pa regresa Aruba cu medaya. Ora ta sali for di Aruba no ta bay pa participa sino pa gana.
Norberto Tromp, vice-presidente di Aruba Taekwondo Association, a indica cu nan a ricibi e muchanan cu hopi entusiasmo y alegria p’e participacion di Team Taekwondo Aruba n’e President’s Cup na Costa Rica. E directiva di Aruba Taekwondo Association ta contento y orguyoso di e hobennan atleta, di chikito te na grandi cu nan presentacion.
Esaki no tabata cualke evento, pero uno di nivel G2. Aki ta haya atleta di diferente parti di mundo cu nan nivel ta hopi halto. Por a mira cu e hobennan Rubiano ta bay participa y demostra, unda a sali bay dilanti cu nan talento cu nan spirito bibo pa haya e logro cu nan a haya awo.
Pa mas lesa TREMPAN.COM.
