Manera ta custumber pa di 29 aña consecutivo ta organisa na e Dam di Cas Ariba, e conocido “Weganan Popular” riba Dia di Himno y Bandera. A combersa cu e representante di Fundacion Don Flip Racing, Joy Werleman, cu a conta con e dia bay.
E representante a conta cu e weganan popular a conoce un desaroyo hopi positivo, e muchanan a pasa bon cu e weganan, tawata tin presentacion di e show- musical y cantantenan cu a presenta nan temanan musical cultural.
Parti atardi a ricibi bishita di 50 turista cu tawata riba un paseo rond di nos isla y a pasa bishita e weganan popular, asina tambe e turistanan a conoce mas di cerca cu e tradicion y custumber nan di Aruba pa medio di tipo di eventonan asina.
E otro weganan cu a tuma luga den categoria di adulto ta: Clabamento di clabo, subimento di palo di seba cu e biaha aki a conta cu participacion di un grupo di dama tambe. No a haci falta e conocido show di balansa auto cu e biaha aki a balansa dos auto na mes momento.
Tin mas sorpresa na caminda pa e publico, Werleman a revela cu pronto e plaza lo conoce un renobacion pa asina por ofrece e publico mas facilidadnan. E organisado ta gradici na nomber di Fundacion Don Flip Racing na tur hende pa nan participacion y cooperacion. Ta pidi pa keda pendiente pa e siguiente eventonan cu lo ta organisando.
